Aqtaýda balanyń qaıtys bolýyna qatysty sot-medıtsınalyq saraptama júrip jatyr – mınıstr

ASTANA. KAZINFORM – Densaýlyq saqtaý mınıstri Aqmaral Álnazarova Aqtaýda 6 jasar qyz balanyń qaıtys bolýyna qatysty sot-medıtsınalyq saraptama júrip jatqanyn aıtty.

- Balasynan aıyrylyp qalǵan otbasyǵa Densaýlyq saqtaý mınıstrligi tarapynan kóńil aıtamyn. Shyn máninde, óte qıyn jaǵdaı. Bul balaǵa qatysty eki ret jedel járdem qyzmeti shaqyrylǵan. Qazir osy oqıǵa boıynsha naqty qorytyndy jasaýǵa erte, sebebi sot-medıtsınalyq saraptamanyń nátıjesi shyqqan joq. Saraptama qorytyndysy aıasynda qosymsha aqparat beremiz, - dedi A. Álnazarova Parlament Májilisinde tilshiler suraǵyna jaýap bere otyryp.

Onyń aıtýynsha, shaqyrtýǵa kelgen jedel járdem brıgadasynyń áreketine qatysty tıisti komıssııa quryldy.

Budan buryn habarlanǵandaı, Aqtaý qalasynyń turǵyny Islam Shyńǵysovtyń aıtýynsha, onyń 6 jasar qyzy jedel járdem qyzmetkerleriniń biliksizdiginen qaza tapqan. 

Qaıǵyly oqıǵa 15-jeltoqsan kúni bolǵan. Búldirshinniń dene qyzýy kenetten kóterilip, ata-anasy jedel járdem shaqyrǵan. Biraq dárigerler balany aýrýhanaǵa jatqyzýdan bas tartyp, jaqsy bolatynyn aıtyp, ketip qalǵan. Qyz balanyń dene qyzýy qaıta kóterilip, jaǵdaıy nasharlaǵanda ákesi qaıta jedel járdem shaqyrǵanyn aıtady. Alaıda, dál sol brıgada kelip, aýrýhanaǵa jatqyzý máselesin talqylap júrgende bala qaıtys bolǵan.