Aqtaýda balabaqsha qyzmetkerleri eńbek quqyǵynyń buzylǵanyna shaǵymdandy
AQTAÝ. KAZINFORM — Aqtaý qalasyndaǵy № 54 «Aınalaıyn» bóbekjaıynyń qyzmetkerleri jańa dırektor kelgennen keıin ujymda psıhologııalyq qysym men túsinispeýshilik kóbeıgenin aıtyp, áleýmettik jeli arqyly memlekettik organdardan kómek surady.
Al qalalyq bilim bólimi júrgizgen zerdeleý barysynda eńbek qatynastary men kadrlyq qujattardy rásimdeýde birqatar kemshilik anyqtalǵan.
Áleýmettik jelide jarııalanǵan jazbada bıyl 16 maýsymda jańa dırektor taǵaıyndalǵannan keıin balabaqshadaǵy jumys jaǵdaıy qıyndaǵan. Qyzmetkerler basshylyq tarapynan dóreki qarym-qatynas, daýys kóterý jáne orynsyz qysym kórsetý faktileri bolǵanyn alǵa tartady.
Sondaı-aq olar balabaqshadaǵy jıhaz, oıynshyqtar men ádistemelik quraldardyń jetkiliksizdigin, kompıýterlik tehnıkanyń tapshylyǵyn, pedagogterdiń usynystary eskerilmeıtinin jazǵan.
Budan bólek, qyzmetkerler eńbekaqyny esepteý men qosymsha eńbek sharttaryn rásimdeýge qatysty sáıkessizdikter baryn aıtyp, jumysqa qabyldaý jáne jumystan shyǵarý tártibine de narazylyq bildirgen. Ujymnyń sózinshe, keıbir qyzmetkerge óz erkimen jumystan shyǵý týraly ótinish jazýǵa qysym jasalǵan. Sonyń saldarynan tájirıbeli mamandardyń birqatary jumystan ketýge májbúr bolǵan.
Qyzmetkerler bul máseleler boıynsha tıisti memlekettik organdarǵa birneshe ret shaǵymdanǵanyn jetkizdi. Olardyń aıtýynsha, dırektorǵa tártiptik jaza qoldanylǵanymen, ujymdaǵy jaǵdaı túbegeıli sheshilmegen.
Mańǵystaý oblystyq bilim basqarmasynyń aqparatyna súıensek, atalǵan jarııalanymda kórsetilgen shaǵym boıynsha Aqtaý qalasy boıynsha bilim bólimi tarapynan zerdeleý júrgizildi.
— Zerdeleý barysynda ujymdyq aryzda kórsetilgen máseleler qaralyp, eńbek qatynastary men kadrlyq qujattamalardy júrgizý barysynda kemshilikter oryn alǵandyǵy anyqtaldy. Belgili bolǵan kemshilikterge baılanysty Aqtaý qalasy boıynsha bilim bóliminiń 2026 jylǵy 21 qyrkúıektegi № 237 buıryǵymen mekeme dırektoryna «eskertý» túrindegi tártiptik jaza qoldanyldy, — dep habarlady oblystyq bilim basqarmasy.
Sonymen qatar, basqarma ókilderi balabaqsha ujymyna túsindirme jumysyn júrgizgen.
Búginde bóbekjaı dırektory eńbekke ýaqytsha jaramsyzdyq paraǵyn ashýyna baılanysty jumys ornynda joq.
Buǵan deıin Almaty oblysynda «Oblystyq № 3 arnaıy mektep-ınternaty» KMM-niń dırektory, onyń orynbasary jáne bas býhgalteri jalǵan jumysqa ornalastyrý arqyly 5,8 mln teńge bıýdjet qarajatyn zańsyz ıemdengenin jazǵan edik.
