Aqtaýda aılaqtaǵy jappaı tóbeleske qatysty qylmystyq is qozǵaldy
AQTAÝ. KAZINFORM — Aqtaýda teńiz jaǵalaýyndaǵy aılaqtardyń birinde birneshe er adam jappaı tóbelesip, turǵyndardyń úreıin ushyrdy.
Beınejazbadan er adamdar arasynda janjal týyndap, onyń sońy tóbeleske ulasqanyn kórýge bolady. Tóbeles barysynda qatysýshylardyń biri sýǵa qulap ketken. Oqıǵa ornynda bolǵan turǵyndar janjaldy toqtatýǵa tyrysqan.
Mańǵystaý oblystyq polıtsııa departamentiniń málimetinshe, quqyq qorǵaý organdary oqıǵaǵa qatysy bar barlyq turǵyndy anyqtap, ustaǵan.
— Er adamdar arasynda týyndaǵan janjal sózge kelýden bastalyp, keıin tóbeleske ulasqan. Oqıǵaǵa qatysýshylardyń barlyǵy Aqtaý qalalyq polıtsııa basqarmasyna jetkizildi. Atalǵan derek boıynsha qylmystyq is qozǵalyp, sotqa deıingi tergep-tekserý amaldary júrgizilip jatyr, — dep habarlady vedomstvodan.
Polıtsııanyń málimetinshe, janjalǵa qatysýshylar medıtsınalyq kómekke júginbegen. Qazirgi ýaqytta oqıǵanyń sebepteri men mán-jaıy anyqtalyp jatyr.
Buǵan deıin, Almatyda jappaı tóbeles kezinde eki jasóspirim mert boldy.
Al, Aqtóbede munaıshylar tóbelesip, bireýi pyshaq jaraqatyn aldy.
