Aqtaýda áıeldi bir jyl boıy ańdyǵan er adamǵa sot úkimi shyqty
AQTAÝ. KAZINFORM — Aqtaý qalalyq soty zańsyz qýdalaý áreketterin jasaǵan azamatqa qatysty úkim shyǵardy. Sottalýshy birneshe aı boıy jábirlenýshiniń erkine qarsy baılanys ornatýǵa tyrysyp, onyń tynyshtyǵyn buzǵan.
Іs materıaldaryna sáıkes, sottalýshy 2025 jylǵy aqpannan 2026 jylǵy aqpanǵa deıin jábirlenýshini júıeli túrde ańdyp, túrli joldarmen mazalaǵan. Ol jábirlenýshiniń júrgen jerine baryp, úıine deıin erip júrgen. Sonymen qatar ártúrli abonenttik nómirler men WhatsApp messendjeri arqyly habarlamalar jazyp, birneshe márte qońyraý shalǵan.
Sot málimetinshe, mundaı áreketter jábirlenýshiniń psıhologııalyq jaı-kúıine áser etip, qorqynysh pen mazasyzdyq týǵyzǵan. Sondaı-aq, onyń konstıtýtsııalyq quqyqtary men bostandyqtaryna nuqsan keltirilgen.
Memlekettik aıyptaýshy sottalýshyny kináli dep tanyp, 100 saǵat qoǵamdyq jumysqa tartýdy surady.
Sot barysynda aıyptalýshy óz kinásin tolyq moıyndap, jábirlenýshiden keshirim suraǵan. Ol mundaı áreketti endi qaıtalamaıtynyn aıtyp, jeńil jaza taǵaıyndaýdy ótindi.
Sot kináni tolyq moıyndaý men shynaıy ókinýdi jeńildetetin mán-jaı retinde baǵalaǵan. Nátıjesinde, sot úkimimen ol QR Qylmystyq Kodekstiń 115-1-baby qýdalaý (stalkıng) boıynsha kináli dep tanylyp, oǵan 100 saǵat qoǵamdyq jumys jazasy taǵaıyndaldy. Úkim zańdy kúshine endi.
Buǵan deıin Astana turǵyny stalkıng úshin 80 saǵat qoǵamdyq jumysqa jegilgenin jazdyq.
