Aqtaýda aıaldamada salynyp jatqan qurylys zańsyz bolyp shyqty
AQTAÝ. KAZINFORM – 15-shaǵyn aýdan 56 úıdiń turǵyndary aýlalarynyń aldyndaǵy aıaldamada boı kótergen qurylysqa qarsylyq bildirip, jarty jyldan beri ádildikke qol jetkize almaı júr.
Aıtýlarynsha, qurylystyń saldarynan úıdiń aýlasyna kirý qıyndap, júretin jer qalmaǵan. Sondyqtan olar quzyrly organdarǵa shaǵymdanyp, qurylysty toqtatýdy talap etken.
- Birinshiden, jer Tımýr Súleımanov degen jeke tulǵaǵa berilgen. Ekinshiden, bul jerdiń astymen kommýnıkatsııa jelisi jáne gaz qubyry ótip jatyr. Onyń ústine 650 sharshy metr aýmaqty alyp alǵan. Bul zańsyz ǵoı, aıaldamaǵa tek 70 sharshy metr bólinedi, - deıdi turǵyndardyń biri Roza Manasova.
Aqtaý qalalyq ákimdiginiń málimetinshe, atalǵan aıaldamanyń aýmaǵyndaǵy jer ýchaskesi 2023 jyly jer komıssııasynyń sheshimimen jeke kásipkerge berilgen. Al, Mańǵystaý oblystyq jer resýrstaryn basqarý departamentiniń bólim basshysy Nurlan Shúıishmaǵanbetovtiń aıtýynsha, kásipkerge aıaldamaǵa qosymsha jer berý kezinde Aqtaý qalalyq ákimdigi tarapynan zańsyzdyqtarǵa jol berilgen.
- Osy 15-shaǵyn aýdanda ornalasqan dúken aıaldama nysany boıynsha Aqtaý qalalyq prokýratýrasynan usynym keldi. Qujattaryn zerdeleý barysynda Aqtaý qalasy ákimdigi tarapynan kelesi zań buzýshylyqtar anyqtaldy. Aıaldamaǵa qosymsha jer berý kezinde jer kodeksiniń talaptary buzylǵan. ıAǵnı, qosymsha berilgen jer ýchaskesi ortaq paıdalanýdaǵy kirme-shyqpa joldan berilip ketken. Sol «Tańsholpan» turǵyn úıiniń kirme-shyqpa jolynan berilgen. Sonymen qatar, qosymsha alǵan jerdiń astynda orta qysymdy gaz qubyry ótip jatyr, - deıdi Nurlan Shúıishmaǵanbetov.
Sondyqtan departament Aqtaý qalalyq jer qatynastary bólimin jaýapker retinde sotqa berip, qosymsha berilgen 2 jer ýchaskesin memleket menshigine keri qaıtarý jáne ákimdik pen kásipker Súleımenovtyń arasyna jasalǵan kelisimshartty buzý jóninde talap aryz joldaǵan.
Buǵan deıin, Mańǵystaýda 71 blogerdiń kirisin jasyrǵany týraly jazǵan bolatynbyz.