Aqtaýda avtobýstaǵy jolaqy 80 teńge bolyp qymbattaýy múmkin

AQTAÝ. QazAqparat - Qazirgi tańda Aqtaý qalasynda qoǵamdyq kóliktegi jol júrý aqysy - 50 teńge. Ol - respýblıka boıynsha eń tómengi kórsetkish. 2020 jyly jańa avtobýstar satyp alynǵannan keıin jolaqy qunyn 80 teńge kóterý josparlanyp otyr, dep habarlaıdy QazAqparat tilshisi.

Qalalyq jolaýshylar kóligi jáne avtomobıl joldary bólimi basshysynyń málimetinshe, 2020 jyldyń ekinshi toqsanynda Qazaqstanda jasalǵan, zamanaýı úlgidegi 18 avtobýs alynbaq.

Osyǵan oraı, jol aqysyn kóterý josparlanyp otyr.

«Jol aqysyn kótermes buryn, qoǵamdyq tyńdaý ótkizip, qoǵamdyq keńeske jáne máslıhatqa usynyp, qoldaý tapqan jaǵdaıda jol aqy quny kóteriledi»,-deıdi qalalyq jolaýshylar kóligi jáne avtomobıl joldary bóliminiń basshysy Jetibaı Qubashev.

Aqtaý qalasy boıynsha jalpy sany 70-ke jýyq avtobýs qyzmet atqarady. Onyń 20-ǵa jýyǵy - «Deý», «Hýıýndaı», al qalǵan bóligi - «Paz» avtobýstary. Sonymen qatar, Aqtaý qalasyna Munaıly aýdanynan №105-marshrýt Aqtaý-Mańǵyshlaq, №103- marshrýt Aqtaý-Qyzyltóbe Aqtaý-Qyzyl tóbe-2, Aqtaý-Batyr, Aqtaý-Baıandy, Aqshuqyr aýylynan 70-ke tarta avtobýs qatynaıdy. Onyń da basym bóligi - «Paz» avtobýstary.