Aqtaýda avtobýs júrgizýshileri nelikten jelige shyqpaǵanyn aıtty
AQTAÝ. KAZINFORM – Búgin Aqtaýda qoǵamdyq kólikterdiń júrgizýshileri narazylyqtaryn bildirip, jumysqa shyqpaı qaldy. Olar jalaqyny kóterip, jumysta jaǵdaı jasaýdy, áleýmettik qoldaý kórsetýdi suraıdy.
Avtobýs júrgizýshileriniń aıtýynsha, olarǵa kúnine 23 myń teńge tólenedi.
Al, basqa óńirlerde 37-43 myń teńge aralyǵynda tóleıdi.
Sonymen qatar, 2 kún jumys istep, 2 kún demalýdyń ornyna olarǵa 10 kún qatarynan jumys isteýge týra kelýde.
- Talabymyz – kúnine 40-45 myń teńge berse, halyqqa qyzmet jasaýǵa daıynbyz.
Basshylyqtyń ótinishimen bizder 10 kúnge deıin jumys istep jatyrmyz. Birinshi qıyndyǵymyz osy – sharshaý.
Ekinshisi - asyǵystyq. Ýaqyt qoıylady, qansha sharshap júrseń de sol ýaqytqa jetýiń kerek.
Keshikseń turǵyndar da aıqaı shyǵarady, - deıdi avtobýs júrgizýshisi Baýyrjan Jumanııazov.
Júrgizýshiler demalmassyz jumys isteýdiń saldarynan, jol kólik apattary bolyp jatqanyn aıtady.
- 10 kún jumys istegen jigit uıyqtap ketip, jol kólik apatyn jasady. Júrgizýshi jetpeıdi, amal joq, shyǵasyń deniń saý bolǵasyn. Artyńda qymbatshylyq qysyp tur, aqsha kerek, sharshaǵanyńa qaramaı avtobýs júrgizesiń. Sony kótere almaı apat jasap júrgender kóp, - deıdi Baýyrjan Jumanııazov.
Júrgizýshilerdiń aıtýynsha, olarda túski as ishetin de ýaqyt joq. Narazylyqtaryn bildirýge nómiri 1, 4, 5, 6, 7, 8, 9, 3 jáne qala - aýdan aralyq avtobýstardyń júrgizýshileri jınaldy.
- Tańǵy 5-te úılerinen shyǵyp, garajǵa keledi, sodan keıin túngi saǵat 22-ge deıin júredi. Kelisimshartta jumys ýaqyty tańǵy 6-dan keshki 18-30 ǵa deıin dep kórsetilgen. Jol-kólik apattarynyń kóbi sodan, uıyqtap ketetini bar, túski úzilis joq. Ýaqytqa úlger deıdi. Qazir Qazaqstan boıynsha jyldamdyqty saǵatyna 50 shaqyrymǵa túsirip qoıdy ǵoı. Men saıajaıda jolaýshy tasımyn, o sheti men bu shetine 53 mınýt berip tur. Saǵatyna 50 shaqyrymmen qalaı úlgeresiń? Oǵan qosa, qazir kondýktordy alyp tastady. Bári sapasyz qyzmetke ákeledi, - deıdi qoǵamdyq kólik júrgizýshisi Itemgen Jetekov.
Mańǵystaý oblystyq jolaýshylar kóligi jáne avtomobıl joldary basqarmasynyń habarlaýynsha, máseleniń mán-jaıyn anyqtaý jáne sheshý boıynsha, ákimdik tarapynan jedel jumys toby qurylyp, oqıǵa ornyna barǵan.
- Avtobýs júrgizishileri tarapynan jalaqyny kóterý, eńbek jaǵdaıyn jaqsartý, tamaqtaný, tynyǵý ýaqyttaryn uzartý t.s.s. máseleler kóterildi. Jumys toby ókilderi men jumys berýshi tarapynan qoldanystaǵy zańnama aıasynda tıisti túsindirme jumystary júrgizilip, máseleniń sheshý joldary qarastyrylatyndyǵy aıtyldy, - delingen habarlamada.
Ekijaqty kelissózder nátıjesinde avtobýstar saǵat 11.00-de shtattyq rejımde marshrýt jelisine qosylǵan.
Buǵan deıin, Aqtaýda qoǵamdyq kólikter júrmeı jatqany týraly jazǵan edik.