Aqtaýda aýyz sý máselesi ýshyǵyp tur: turǵyndar táýlik boıy sýsyz qalyp otyr
AQTAÝ. KAZINFORM – Aqtaýda sońǵy aptalarda aýyz sýǵa qatysty másele qaıta ýshyqty. Qala turǵyndary áleýmettik jelilerde birneshe shaǵyn aýdanda sýdyń táýliktep berilmeıtinin aıtyp, shaǵymdanyp jatyr. Keıbir turǵyndardyń aıtýynsha, aýyz sý tek túngi ýaqytta ǵana beriledi.
Aqtaýlyq Anna Dıdenkonyń sózinshe, olar eki aptadan beri sýdy tek túnde jınap, paıdalanýǵa májbúr.
– Kúndiz múlde sý bolmaıdy. Biz joǵarǵy qabatta turamyz. Sý tek túngi saǵat 3:00 men 4:30 aralyǵynda keledi. Sol ýaqytta sý jınap úlgerýimiz kerek. Kúni boıy ydys jýylmaı, turmystyq jumystardyń bári keıinge qalady, - deıdi turǵyn.
Al oblystyq Sý resýrstary jáne ırrıgatsııa basqarmasy basshysynyń orynbasary Ánýar Túlıakovtyń aıtýynsha, máseleniń negizgi sebebi sý tapshylyǵy emes, tozyǵy jetken ınjenerlik jeliler. Qazir óńirdegi sý tuşytý zaýyttary qalany qajetti kólemdegi sýmen qamtamasyz etip otyr. Alaıda qaladaǵy sý qubyrlarynyń shamamen 80 paıyzynyń tozýy saldarynan apatty jaǵdaılar jıilegen.
– Zaýyttarda sýmen qamtamasyz etý boıynsha eshqandaı másele joq. Sý jetkilikti. Qazirgi qıyndyqtardyń negizgi sebebi – eskirgen qubyrlar. Olardy kezeń-kezeńimen jańartyp jatyrmyz. Birinshi shaǵyn aýdannan bastap altynshy shaǵyn aýdanǵa deıin sý jáne káriz jelileri tolyq aýystyryldy. Bul jumystar ári qaraı jalǵasady, - dedi Ánýar Túlıakov.
Aıta keteıik, Aqtaý qalasynda shamamen 500 shaqyrym sý qubyry jańartýdy qajet etedi. Mamandardyń aıtýynsha, jeliler tolyq jańartylyp, qalaǵa turaqty aýyz sý berý úshin shamamen úsh jyl ýaqyt qajet.
Buǵan deıin Oljas Bektenov Almatydaǵy jylý elektr ortalyǵynyń jumys qarqynyn synǵa aldy.
