Aqtaýda áýe keńistiginiń qorǵaýshylary Otanǵa adal bolýǵa sert berdi

AQTAÝ. KAZINFORM – Kóktemde áýe shabýylyna qarsy qorǵanys brıgadasyna kelgen 190-nan astam sarbaz saltanatty jaǵdaıda áskerı ant qabyldady. 

Qyzylorda, Batys Qazaqstan, Atyraý, Túrkistan, Aqtóbe jáne Mańǵystaý oblystarynan shaqyrylǵan jas sarbazdar bir aı ishinde alǵashqy áskerı daıyndyqtan ótip, jalpyáskerı jarǵylardy, saptyq jáne atys daıarlyǵynyń negizderin meńgerdi. 

Olar komandırleriniń, Qarýly kúshter ardagerleriniń, sarbaz analary komıteti ókilderiniń, týǵan-týystary men jaqyndarynyń aldynda ant berip, Otandy qorǵaýǵa árdaıym daıyn ári antqa adal bolýǵa sert berdi.

Saltanatty rásim bólimshe Jaýyngerlik týynyń shyǵarylýymen jáne Qazaqstan Respýblıkasynyń Memlekettik ánuranynyń oryndalýymen bastaldy.

– Sizder úlken yntamen jattyǵyp, áskerı istiń negizderin meńgerdińizder. Búgin myńdaǵan adamnyń aldynda erjúrek ári batyl bolýǵa, qyzmettiń qıyndyǵyna tótep berýge, naǵyz Otan qorǵaýshy bolýǵa sert berdińizder. Sizderge myqty densaýlyq pen sátti qyzmet tileımin, - dep jas sarbazdardy osy mańyzdy oqıǵamen áýe shabýylyna qarsy qorǵanys brıgadasynyń komandıri polkovnık Marat Qudabaev quttyqtady.

Sarbazdarǵa jyly lebizin ata-analar da bildirdi. Otbasylar atynan sóz sóılegen Olesıa Poloz sarbazdarǵa tózimdilik, batyldyq pen rýhanı kúsh tiledi. 

Resmı bólim aıaqtalǵan soń, jas jaýyngerler ózderiniń mashyqtaryn kórsetti. Olar qol kúresi elementterin, saptyq júris pen qarýmen jumys isteý tásilderin kórsetti. Sarbazdardyń óneri ata-analarǵa naǵyz tosynsyı boldy. Olar uldarynyń daıyndyǵynyń joǵary deńgeıine kýá boldy.

Іs-shara sońynda komandalyq quram týystarmen kezdesý ótkizip, olardyń barlyq suraǵyna jaýap berdi jáne baılanys úshin qajetti aqparatty usyndy. Bul kúni jas sarbazdarǵa alǵashqy qysqa merzimdi demalys berildi. 

Endi olar Batys Qazaqstan óńiriniń áýe shebin kúzetý úshin qyzmet etý oryndaryna attanady. Sarbazdar Aqtóbe, Batys Qazaqstan jáne Atyraý oblystaryndaǵy bólimderge, sondaı-aq Beıneý kentine, Jańaózen jáne Fort-Shevchenko qalalaryna bólinedi. 

Eske sala keteıik, buǵan deıin Astanada «Jas sarbaz» uıymynyń úzdik jas tárbıelenýshileri anyqtalatynyn jazǵan edik.