Aqtaýda attraktsıon toqtap, balalar tómen salbyraǵan kúıi qalyp qoıdy

ASTANA. QazAqparat – Aqtaýda Rixos qonaq úıiniń aýmaǵynda ornalasqan attraktsıon joǵary kóterilip toqtap qalǵan. Onyń ishinde balalar boldy, dep habarlaıdy QazAqparat tilshisi.

Aıta keteıik, búgin áleýmettik jelilerde Aqtaýda attraktsıon toqtap, oǵan mingen balalardyń basy tómen salbyraǵan kúıi qalyp qoıǵany kórsetilgen vıdeo tarady.

«Keshe polıtsııaǵa Aqtaý qalasyndaǵy oıyn-saýyq saıabaǵynda attraktsıonnyń toqtap qalǵany boıynsha qońyraý tústi. Oqıǵa ornyna ıývenaldy polıtsııa qyzmetkerleri bardy. Ol jerge barǵan mamandar jaryqtyń bolmaǵanynan attraktsıonnyń toqtaǵanyn kórdi. Bul oqıǵaǵa baılanysty attraktsıon ıesimen profılaktıkalyq áńgime júrgizildi. Aqtaýda jaryqty sóndirý máseleleri bolyp jatqanyn ózderińiz de kórip jatqan shyǵarsyzdar», - dep tilshi saýalyna jaýap berdi Mańǵystaý oblystyq polıtsııa departamentinen.

Al, qalalyq ákimdiktiń baspasóz qyzmetinen málimdegendeı, bul attraktsıondar Rixos qonaq úıiniń menshigindegi aýmaqta ornalasqan. Tıisinshe, jergilikti quzyrly organ oqıǵaǵa qatysty túsinik berýge quqyly emes ekenin jetkizdi.

Munymen qatar, Mańǵystaý oblystyq Tótenshe jaǵdaılar departamentiniń baspasóz qyzmetine de habarlasyp kórik. Atalǵan vedomstvo bul oqıǵa boıynsha qońyraý túspegenin alǵa tartty.