Aqtaýda atmosferalyq aýanyń lastanǵany anyqtaldy

AQTAÝ. KAZINFORM – Aqtaýlyqtar 15 jeltoqsan kúni keshke benzın nemese gazdyń ıisine uqsaıtyn aýadaǵy ótkir ıiske jappaı shaǵymdandy. Mańǵystaý oblystyq tótenshe jaǵdaılar departamentiniń málimetinshe, Aqtaý qalasy men Munaıly aýdanynyń turǵyndarynan shaǵymdar túngi saǵat 21:50-den bastap túsken.

- Aqtaý qalasy men Munaıly, Túpqaraǵan, Mańǵystaý, Beıneý jáne Qaraqııa aýdandarynda órt tirkelmegen. Jaǵdaıdy naqtylaý úshin kórshiles óńirlerdiń kezekshi qyzmetterine, onyń ishinde Reseı Federatsııasynyń Astrahan oblysy jáne Atyraý oblysynyń tótenshe jaǵdaılar departamentine suraýlar jiberildi. Ol jaqtarda da janý oshaqtary tirkelgen joq, - delingen habarlamada. 

Osy jaǵdaıǵa baılanysty Mańǵystaý oblystyq ekologııa departamentiniń qyzmetkerleri atmosferalyq aýany tekserip, nátıjesinde jaǵymsyz ıistiń sebebin anyqtaǵan. 

- Ekologııa departamentiniń zerthanalyq-taldamaly baqylaý bóliminiń mamandary aǵymdaǵy jyldyń jeltoqsan aıynyń 15-16 kúnderi qala aýmaǵynan jáne jaqyn ornalasqan eldi-mekenderden atmosferalyq aýaǵa monıtorıng jumystaryn júrgizdi. Qala aýmaǵynda jaǵymsyz ıis anyqtaldy. Jaǵymsyz ıistiń shyǵý oshaǵy ónerkásiptik aımaq aýmaqtarynda, sonyń ishinde Rekon bazasy aýmaǵynda kómirtegi oksıdinen (SO) shekti raýaldy kontsentratsııadan asýlar anyqtaldy, - delingen habarlamada.

Ekologııa departamentiniń mamandarymen tótenshe jaǵdaılar departamentiniń qyzmetkerlerimen birlesip, ózge de óndiristik nysandarda tekserý jumystaryn jalǵastyrýda. 

Buǵan deıin, Shymkentte turǵyndar jaǵymsyz ıiske shaǵymdanǵan bolatyn.