Aqtaýda atmosferalyq aýaǵa kúkirtti kómirtek taralǵany anyqtaldy

AQTAÝ. KAZINFORM — Buǵan deıin Aqtaýda jáne oǵan jaqyn ornalasqan Munaıly aýdanynda turǵyndar birneshe kún boıy jaǵymsyz ıiske shaǵymdanǵan edi. 

Soǵan oraı, Mańǵystaý oblystyq ekologııa departamentiniń qyzmetkerleri kúndiz-túni atmosferalyq aýaǵa monıtorıng júrgizgen. Nátıjesinde bıtým zaýytynyń sanıtarlyq-qorǵaý aımaǵynan 2 kún qatarynan kúkirtti kómirtektiń shekten tys artqany anyqtaldy.

— Ekologııa departamentiniń mamandary 15-22 jeltoqsan kúnderi Aqtaý qalasy jáne qala syrtyndaǵy óndiristik aımaqtarmen eldi mekenderdiń atmosferalyq aýasyna jospardan tys monıtorıng jumystaryn júrgizdi. Oǵan aǵymdaǵy jyldyń 15 jeltoqsan kúni qala aýmaǵynda taralǵan jaǵymsyz ıis boıynsha áleýmettik jelide turǵyndar tarapynan túsken shaǵymdar negiz boldy. Atqarylǵan monıtorıng jumystary barysynda 19 jáne 20 jeltoqsan kúnderi «Caspi Bitum» JShS sanıtarlyq-qorǵaý aımaǵynan atmosferalyq aýadan synamalar alý kezinde kómirtek dısýlfıdinen (CS2) shekti ruqsat etilgen kontsentratsııadan artýlar (ShRK) baıqaldy. «Caspi Bitum» JShS tekseris ashý úshin anyqtalǵan faktiler prokýratýra organdaryna joldanady, — delingen habarlamada. 

Buǵan deıin, Aqtaýda taǵy bir kásiporynnyń aýmaǵynda atmosferalyq aýanyń lastanǵany anyqtalǵan edi.