Aqtaýda astana kúnine oraı jańa turǵyn úı kesheni paıdalanýǵa berildi
7,9 jáne 12 qabattan turatyn úıler «Nurly jer» memlekettik baǵdarlamasy aıasynda boı kótergen. Saltanatty sharaǵa qatysqan Aqtaý qalasynyń ákimi Nurdáýlet Qılybaı baspanaly bolǵan turǵyndardy jańa qonysymen quttyqtady.
«Memleket qoldaýynyń nátıjesinde baspanaly bolyp, qonys toıyn toılaıtyndar sany artyp keledi. Ótken aptada Aqtaýda 216 otbasy jańa úıge kirip, qýanyshqa kenelgen edi. Mine búgin Astana kúni qarsańynda taǵy bir top turǵynǵa páter kiltin tabystadyq. Merekemen tuspa-tus kelgen qonys toılaryńyz qutty bolsyn. Shańyraqtaryńyz shattyqqa toly bolyp, bereke-birligimiz arta bersin»,-dedi qala ákimi.
33 shaǵynaýdanda ornalasqan 670 páterden turatyn «Aqqý-3» turǵyn úı kesheniniń alǵashqy bóligi ótken aıda qoldanysqa berilgen edi. Bul joly 227 páteri tabystaldy. Úsh bólikten turatyn turǵyn úı kesheniniń qalǵan bóligin aıaqtaý jumystary qarqyndy júrip jatyr.
«Aqqý-3» turǵyn úı kesheninen jańa páterge ıe bolǵandar – túrli sanat boıynsha Aqtaý qalasy ákimdiginde kezekte turyp, «Otbasy» banki arqyly baıqaýdan iriktelgender. Saltanatty sharaǵa jınalǵandar jas otbasy Meıram Saparbaevtyń jańa shańyrańynda bolyp, páter ishin aralap kórdi.
«Memlekettiń qol jetimdi baǵdarlamasy arqasynda, búgin bizdiń otbasymyz úshin qýanyshty kún. 5 jyldan astam ýaqyt jańa páterdi kúttik. Búgin memlekettik baǵdarlama arqyly 3 bólmeli páterge ıe boldyq. Memlekettiń jas otbasylar men ózge de sanattaǵy azamattar qoldaýy úshin rahmet», - deıdi turǵyn.
Qala basshysy N.Qılybaıdyń aıtýynsha, elimizde qoljetimdi baspana máselesin sheshýge aıryqsha kóńil bólinýde. Bıyl oblys ortalyǵynda 86 myń sharshy metr turǵyn úı salý josparlanǵan. Bul úılerdi Memleket basshysynyń tapsyrmasymen ázirlengen baǵdarlamalarǵa sáıkes «Otbasy» banki arqyly alýǵa múmkindik beriledi.
