Aqtaýda Áskerı-teńiz kúshteri kemeleriniń jaýyngerlik ázirligi tekserildi
ASTANA. KAZINFORM — Aqtaý garnızonynda Qorǵanys mınıstriniń birinshi orynbasary — Bas shtab bastyǵy general-leıtenant Qanysh Ábýbákirov Áskerı-teńiz kúshteriniń jaýyngerlik, tehnıkalyq jáne jedel ázirligin jan-jaqty tekserý júrgizdi.
Ásirese kezekshilikti uıymdastyrýǵa, jaýyngerlik daıyndyq pen bólimshelerdiń tynys-tirshiligine basa nazar aýdaryldy. Mınıstrdiń birinshi orynbasary teńizshilerdiń qyzmetimen jáne turmys jaǵdaıymen tanysyp, olardyń materıaldyq-tehnıkalyq quraldarmen qamtamasyz etilý deńgeıin zerdeledi.
Desanttyq-shabýyldaý áskerlerine qarasty desanttyq-shabýyldaý brıgadasyna barǵan kezde general-leıtenant Qanysh Ábýbákirov jeke quramǵa úlgili qyzmeti men áskerı boryshqa adaldyǵy úshin alǵys bildirdi.
— Senderdeı rýhy myqty uldardy tárbıelegen ata-analaryńa shyn júrekten alǵys aıtamyn. Qyzmet barysynda úlken tájirıbe jınadyńdar. Aldaǵy ýaqytta da eldiń senimdi tiregi, naǵyz patrıot bolatyndaryńa senimdimin, — dedi ol.
«Oral» zymyran-artıllerııalyq kemesinde general-leıtenant Q. Ábýbákirov qarý-jaraq júıeleriniń, navıgatsııa jáne radıotehnıkalyq jabdyqtardyń daıyndyǵyn tekserdi. Oqý-jattyǵý jıyny barysynda ekıpajdyń atys tapsyrmalaryn oryndaý kezindegi is-qımyly pysyqtalyp, jeke quramnyń úılesimdiligine baǵa berdi.
Sonymen qatar, Bas shtab bastyǵy «Qaısar» dıversııaǵa qarsy kateri men arnaıy bólimshelerdiń Kaspıı teńiziniń qazaqstandyq akvatorııasy men porttyq aımaqtaryn sý asty jáne sý ústi qaterlerinen qorǵaýǵa ázirligin baqylady.
Ol Qazaqstannyń Áskerı-teńiz kúshteri óńirlik turaqtylyqty saqtaýda sheshýshi ról atqaratynyn, sondyqtan olardy jańǵyrtý qorǵanys vedomstvosynyń basym baǵyttarynyń biri bolyp qala beretinin atap ótti.
Inspektsııa qorytyndysy boıynsha Qorǵanys mınıstriniń birinshi orynbasary general-leıtenant Qanysh Ábýbákirov jaýyngerlik daıarlyqty jetildirýge jáne bólimshelerdiń úılesimdiligin nyǵaıtýǵa baǵyttalǵan naqty tapsyrmalar berdi.
Budan buryn Qorǵanys mınıstri Arnaıy operatsııalar kúshteriniń Astanadaǵy áskerı bólimderin teksergenin jazǵanbyz.
