Aqtaýda asa iri mólsherde esirtki satqan kýrer ustaldy

AQTAÝ. QazAqparat – Mańǵystaý oblysy PD esirtki qylmysyna qarsy is-qımyl basqarmasynyń qyzmetkerleri Aqtaý qalasynyń JEO-2 aýmaǵyndaǵy ónerkásiptik aımaqta Almaty oblysynyń 22 jastaǵy turǵynyn ustady, dep habarlaıdy QazAqparat.

ІІM baspasóz qyzmetiniń málimetinshe, jigit týrıstik aımaqqa «jyldamdyq» sıntetıkalyq preparatyn asa iri mólsherde satý maqsatynda kelgen. Qaskóı jaldamaly páterde turǵan. Jeke tintý júrgizý barysynda ustalǵan adamnan ishinde «alfa-PvP» («jyldamdyq») sıntetıkalyq esirtki zaty bar bir úlken qara orama tárkilendi. Onyń jalpy salmaǵy 788 gramm bolyp shyqty.

Ustalǵan jigittiń aıtýynsha, ol kýrer retinde eki aıǵa jýyq jumys istegen, al Aqtaýǵa iri partııalarmen sıntetıkalyq esirtki satý úshin kelgen. Sıntetıkalyq esirtkini ol Telegram messendjerindegi sms arqyly kýratordyń nusqaýy arqyly alǵan.

QR QK-niń 297-babynyń 3-bóligi «Esirtki zattaryn ótkizý maqsatynda asa iri mólsherde zańsyz satyp alý jáne saqtaý» boıynsha sotqa deıingi tergeý júrgizilip jatyr.

Aqtaý qalasynyń soty eki aı merzimge qamaýda ustaý túrindegi bultartpaý sharasyn qabyldady. Qylmystyq is boıynsha odan ári jedel is-sharalar men tergeý áreketteri júrgiziletin bolady.