Aqtaýda «Arysqa kómek» aktsııasy aıasynda 4 tonna gýmanıtarlyq júk jınaldy
Mańǵystaý oblysy jastar resýrstyq ortalyǵynyń «Arysqa kómek» aktsııasy aıasynda «Arman» kovorkıng ortalyǵynda kómek jınaý pýnkti ashyldy. Onda Túrkistan oblysy Arys qalasyndaǵy tótenshe jaǵdaı saldarynan zardap shekkender úshin 4 tonna gýmanıtarlyq júk jınaldy. Onyń ishine azyq-túlik, kıim-keshek, dári-dármekter, jeke gıgıena quraldary jáne birinshi kezekte qajetti zattar bar.
Zardap shekkenderge kómek kórsetýge Aqtaý qalasynyń «Maǵash», «Masat» jáne «Asar-S» bazarynyń saýdagerleri, Mańǵystaý oblystyq dárigerler men provızorlar qaýymdastyǵy, jeke kásipkerler, sonymen qatar, volonterler men qala turǵyndary atsalysty.
«25 maýsymnan bastap oblystaǵy barlyq aýdandyq jáne qalalyq jastar resýrstyq ortalyqtarynda kómek pýnkti óz jumysyn bastady. Aqtaý qalasy boıynsha atalǵan aktsııaǵa 30 volonter jumyldyrylyp, arnaıy aqparattyq is-sharalar uıymdastyryldy. 1,5 kúnde Aqtaý qalasynyń jomart azamattarynyń qoldaýymen 4 tonnaǵa jýyq gýmanıtarlyq júk jınaldy. Sonymen qatar, qala turǵyndary ákelgen tez buzylatyn azyq-túlikti Mańǵystaý oblystyq meshiti janyndaǵy medresege tabystadyq. Jastarǵa arnalǵan «Arman» kovorkıng ortalyǵynda ornalasqan kómek pýnkti aqshalaı kómek túrin qabyldamady, aqshalaı kómek kórsetemin deýshiler «Túrkistan» korporatıvtik áleýmettik damý qoryna aýdarý kerektigi túsindirildi. Osy rette ıgi iske atsalysqan azamattarǵa, qala turǵyndaryna alǵys aıtamyz», - dep atap ótti Mańǵystaý oblysy jastar resýrstyq ortalyǵynyń dırektory Abylaı Fazylbek.
