Aqtaýda apatqa ushyraǵan ushaq bortynda 69 adam boldy – TJM

ASTANA. KAZINFORM – Elimizdiń Tótenshe jaǵdaılar mınıstrligi Aqtaý mańynda bolǵan áýe apatyna qatysty sońǵy málimetpen bólisti.

- Aldyn ala aqparat boıynsha ushaq bortynda 69 adam bolǵan, onyń 5-eýi – ekıpaj múshesi. Onyń ishinde 42 Ázirbaıjan azamaty, 6 Qazaqstan azamaty, 3 Qyrǵyzstan azamaty jáne 16 RF azamaty bolǵan, - dedi TJM Tótenshe jaǵdaılardy joıý departamenti apat-qutqarý qyzmetteriniń kúshteri men quraldary basqarmasynyń bastyǵy Qaırat Janaspaev.

Onyń aıtýynsha, qazir oqıǵa ornynda qutqarý jumystary jalǵasyp jatyr. Qutqarý jumystaryna 701 jeke quram jáne 82 birlik tehnıka jumyldyryldy.

- 28 adam aýrýhanaǵa jetkizildi, onyń 2-eýi bala, - dep tolyqtyrdy mınıstrlik ókili.

Buǵan deıin habarlaǵanymyzdaı Aqtaýdaǵy ushaq apatyna qatysty sotqa deıingi tergeý bastaldy. 

Aıta keteıik, QR Prezıdentiniń tapsyrmasymen áýe apatyna baılanysty Memlekettik komıssııa quryldy. 

Sondaı-aq, Mańǵystaý oblysynyń ákimi ushaq apaty bolǵan jerge bardy. 

Apatqa ushyraǵan ushaq bortynda Qazaqstannyń 6 azamaty boldy. 

QR Kólik mınıstrligi málim etkendeı, Ázerbaıjan tarapynyń aldyn ala aqparaty boıynsha, bortta 62 jolaýshy men 5 ekıpaj múshesi bolǵan.