Aqtaýda Analar úıiniń arqasynda 156 sábı jetimder úıine túspeı, anasynyń janynda qalǵan
Oblys ákiminiń orynbasary Ulyqbek Tinálıevtiń qatysýymen «Otbasy – bala úshin eń jaqsy oryn» taqyrybynda dóńgelek ústel ótti.
Onda Mańǵystaý oblysyndaǵy áleýmettik-jetimdik máselesin sheshý joldary talqylandy. Sharany «Ana úıi» qoǵamdyq qory uıymdastyrdy.
Jıynda sóz sóılegen Ulyqbek Tinálıev jetim jáne ata-ana qamqorlyǵynsyz qalǵan balalar memlekettik organdar men el basshylyǵynyń turaqty baqylaýynda ekenin atap ótti.
- Balalarymyzdyń jarqyn bolashaǵy elimiz úshin óte mańyzdy. Ókinishke oraı, bizdiń qoǵamda ata-analary bolsa da, jetim qalǵan balalar bar. Búgingi tańda bul - basty másele. Bizdiń oblysta 456 jetim jáne ata-ana qamqorlyǵynsyz qalǵan bala bar. Onyń ishinde 397 bala qorǵanshylyqta jáne qamqorlyqta, 10 bala patronattyq tárbıede, 49 bala ınternatta tárbıelenip jatyr. Ár bala óz otbasynda tárbıelenip, otbasylyq qundylyqtardy sezinip ósýi kerek. Bul baǵytta «Ana úıi» qoǵamdyq qory úlken úles qosyp júr. Sondyqtan osy máseleni sheshýge birge atsalysaıyq, - dep atap ótti Ulyqbek Tinálıev.
Aqtaý qalasyndaǵy «Analar úıi» resýrstyq ortalyǵynyń 8 jyldyq jumysynyń arqasynda 156 bala balalar úıine túsken joq.
Sonymen qatar qor ómirlik qıyn jaǵdaıǵa tap bolǵan jas bosanǵan analarǵa kómek kórsetedi, olarǵa baspana, medıtsınalyq jáne psıhologııalyq kómek kórsetedi.
Qazirgi ýaqytta qor elimiz boıynsha 6 myńǵa jýyq anaǵa qamqorlyq jasaıdy.
Sondaı-aq qor jetim balalardy qazaqstandyq otbasylarǵa ornalastyrý maqsatynda «Bala asyrap alý» jónindegi ulttyq agenttik baǵytyn damytýdy bastady.
«Ana úıi» QQ basshysy Ajarkúl Qylyshbaevanyń aıtýynsha, jetim balalarǵa kómek kórsetý, atap aıtqanda, sábılerdiń balalar úıine túspeýine jol bermeý jáne jetim balalar sanyn azaıtý máselelerine qoǵamnyń nazaryn aýdarý úshin bilim berý mekemeleriniń, qoǵamdyq jáne saraptamalyq uıymdardyń birlesip jumys jasaýy asa mańyzdy.
Jıynda atalǵan másele talqylanyp, sheshý joldary usynyldy.
