Aqtaýda amfıteatr ashyldy
ASTANA. QazAqparat - Aqtaýda ashyq aspan astyndaǵy amfıteatr ashyldy. Keń, zamanaýı úlgidegi kópfýnktsıonaldy sahnanyń uzyndyǵy 70 metr, bıiktigi 9 metr bolatyn 19 baǵanasy bar, dep xabarlaıdy Qazaqparat tilshisi oblys ákimdiginiń baspasóz qyzmetine silteme jasap.
Amfıteatr 15-shaǵynaýdandaǵy 2 shaqyrymǵa jýyq aýmaqty alyp jatqan jańa jaǵalaýda ornalasqan. Saxna «Led-panel», zamanaýı jaryq tehnıkalarmen jabdyqtalǵan. Munda bir mezette 1000 ónerpaz óner kórsete alady. Olardyń ónerin 25 myń kórermen tamashalaýǵa múmkindik bar.
Ashylý saltanatyna Mańǵystaý oblysynyń ákimi Eraly Toǵjanov arnaıy qatysyp, jınalǵandardy jańa nysannyń ashylýymen quttyqtady. «Bul Prezıdentimiz N.Á. Nazarbaevtyń «Rýhanı jańǵyrý» baǵdarlamasynyń aıasynda Elbasynyń óziniń qoldaýymen, halyqtyń qalaýymen el ıgiligine arnalyp salynǵan, halqymyzǵa rýhanı jol kórsetetin úlken nysan dep sanaımyn. Ózderińizge belgili, sanaýly kúnderden soń búkil el bolyp úlken shara «Aqtaý sammıtin» Mańǵystaý oblysynda ótkizgeli otyrmyz. Árbir januıa shańyraǵyna qonaq kelse úı-jaıyn túzep, qonaqty jaqsylap kútýge ázirlenedi. Olaı bolsa, Memleket te bizdiń úıimiz. Teńiz jaǵasy abattandyrylyp, joldar salynyp, kóshelerde shamdar jarqyraı tústi, kóp qurylystar men nysandar boı kóterdi. Halyq demalatyn oryndar paıda boldy. Sonyń bir dáleli, mine búgin ózderińiz kýá bolyp otyrǵan, kópten kóńilde júrgen nysannyń ashylýy», - dedi oblys ákimi Eraly Toǵjanov.
Amfıteatrda festıval, kontsert pen túrli mádenı sharalar uıymdastyrylady. Sonymen qatar, sahna tórinde turǵan ortalyq baǵananyń ústine «Sýyn aıǵyr» músini qoıylǵan. Músinniń bıiktigi 4 metr 20 sm. Sahna astynda tehnıkalyq qyzmetkerler men ártisterge arnalǵan bólmeler bar. Sondaı-aq, munda arnaıy pandýstar ornatylǵan.
Jańa jaǵalaýǵa 48 myń sharshy metr kespe tastar tóselgen. Onyń sahna aldyndaǵy 3 myń sharshy metr bóligi qyzyl, kók, sary túske enip jarqyrap turady.
Sondaı-aq, jańa jaǵalaýda 4 tynyǵatyn oryn (rotonda), 6 alań (aldaǵy ýaqytta taǵy 6 alań salynady), 340 oryndyq, 340 qoqys jáshigi, 4 balalar alańy bar. Onyń bireýi vorkaýtpen aınalysyp, jattyǵýǵa arnalǵan oryn bolady. Sondaı-aq, 16 eskertkish qoıylǵan. Balalar alańynyń janyna turǵyndardyń tynyǵýyna arnalǵan oryndyqtar men 4 shatyr qoıylady. Qurylysqa 500 adam jumyldyryldy. Qyrkúıek aıynyń sońyna deıin taǵy 17 myń sharshy metr kespe tastar tóseledi dep josparlanýda.
Amfıteatrdyń saltanatty ashylý rásiminde teatrlandyrylǵan qoıylym qoıylyp, aımaq ónerpazdary án aıtyp, bı bılep jınalǵandardy tánti etti.
