Aqtaýda ámbebap qutqarý bólimshesi ashyldy
AQTAÝ. KAZINFORM — TJM mınıstri Shyńǵys Árinov Kaspıı teńiziniń jaǵalaýynda jańa órt sóndirý-qutqarý bóliminiń ashylýyna qatysty. Bul týraly vedomstvonyń baspasóz qyzmeti jarııalady.
— Biz zamanaýı tásilderdi qoldanamyz. Mundaı nysandar ártúrli óńirlerde salynyp jatyr. Jańa depo nebári eki jarym aıda salyndy. Bıyl Mańǵystaý oblysynda taǵy bir depo men 7 órt sóndirý beketiniń qurylysyn aıaqtaımyz, — dedi Shyńǵys Árinov.
Іs-shara barysynda mınıstr órt-qutqarý tehnıkasynyń kiltterin tabystap, bólim bastyǵyna sımvolıkalyq kiltti tapsyrdy.
— Jańa depo jergilikti atqarýshy organdardyń qarajaty esebinen salyndy. Ǵımaratta jeke quramǵa arnalǵan úı-jaılar, oqý synyptary, ashana, jabdyq saqtaý aımaqtary men tehnıkaǵa arnalǵan boks, sondaı-aq «Batyr team» workout alańy qarastyrylǵan. Bólimshe jalpy sany shamamen 40 myń adam turatyn Aqtaýdyń tómengi, Prımorskıı shaǵyn aýdandaryna, Ómirzaq aýylyna, ónerkásiptik aımaqtar men jaǵalaýdaǵy aýmaqtarǵa qyzmet kórsetetin bolady, — delingen aqparatta.
Órt sóndirýshilermen qatar munda qutqarýshylar da qyzmet atqaratynyn atap ótý kerek. Bul túrli tótenshe jaǵdaılarǵa jyldam den qoıý múmkindigin qamtamasyz etetin bolady.
Buǵan deıin Túrkistanda kásipkerlerdiń qoldaýymen órt sóndirý beketi ashylǵan bolatyn.