Aqtaýda «Altyn belgisiz» qalǵan túlektiń isi mınıstrlikke deıin jetti
AQTAÝ. KAZINFORM — Mańǵystaý oblysynyń bilim basqarmasy mektep túlegi Úmit Ersheevanyń «Altyn belgi» ıegerleriniń qataryna engizilmeýine qatysty ótinishi boıynsha tekserý júrgizdi.
Tekserý qorytyndysy boıynsha Mańǵystaý aýdandyq bilim bólimine máseleni sheshýge qatysty naqty tapsyrmalar berilgen.
— Aýdandyq bilim bólimi júrgizgen jumystardyń qorytyndysy boıynsha 2026 jylǵy 10 tamyzda azamatshanyń ótinishi tolyq qanaǵattandyrylatyn boldy, — dep habarlady Mańǵystaý oblysynyń bilim basqarmasy.
Ótinish ıesi mektep qabyrǵasynda 11 jyl boıy úzdik baǵamen oqyǵanyn, alaıda «Altyn belgi» ıegerleriniń qataryna engizilmegenin aıtqan. Onyń sózinshe, ol Almaty qalasyndaǵy «Turan» ýnıversıtetiniń tórt jyldyq tegin oqý múmkindigin konkýrs arqyly jeńip alǵan. Alaıda atalǵan múmkindikti paıdalaný úshin «Altyn belgi» ıegeri ekendigin rastaý talap etilgen.
Bilim basqarmasynyń habarlaýynsha, máseleni túpkilikti sheshý úshin ótinish ıesine Shetpe aýylynda ornalasqan Mańǵystaý aýdandyq bilim bólimine júginý usynyldy.
Sonymen qatar, osy jaǵdaıǵa baılanysty jaýapty tulǵalarǵa qatysty tıisti sharalar qoldanylatyny aıtyldy.
Buǵan deıin, Mańǵystaýda 13 jastaǵy balanyń ólimine qatysty qylmystyq is sotqa joldandy.
