Aqtaýda alıment boryshkerlerine qatysty 11 qylmystyq is tirkeldi
ASTANA. KAZINFORM — Aqtaýda boryshkerlerden 135 mln teńgege jýyq qarajat óndirildi.
Aqtaý qalasy prokýratýrasynyń bastamasymen bıyl alıment alýshylardyń paıdasyna 134,8 mln teńge óndirildi.
Onyń ishinde alıment boıynsha boryshkerlerden 2 páter, 1 jer ýchaskesi men 3 avtokóligi tárkilenip, bereshek esebine óndirip alýshylarǵa berildi.
Mysaly, jeke sot oryndaýshynyń bereshekti anyqtaý týraly qaýlysyna sáıkes boryshkerdiń bereshek somasy 37,8 mln teńge bolǵan.
— Tekserý barysynda boryshkerdiń atynda Toyota Land Cruiser markaly avtokóligi bar ekeni anyqtaldy.
Jeke sot oryndaýshy atalǵan avtokólikti 25,5 mln teńgege baǵalap, bereshekti óndirý maqsatynda óndirip alýshynyń paıdasyna berildi, — delingen habarlamada.
Al basqa jaǵdaıda, azamattan bereshek óndirý maqsatynda 13,4 mln teńgege baǵalanǵan páterdiń úlesi óndirip alýshynyń paıdasyna berildi.
Odan basqa, kiristerin jasyryp, ata-analyq mindetterin oryndaýdan jaltarǵan 46 boryshker ákimshilik jaýaptylyqqa tartylyp, 11 boryshkerge qatysty qylmystyq is tirkeldi.
Aıta ketelik Jambyl oblysynda 8,6 mln teńge alıment qaryzy múlikpen ótelgen edi.
