Aqtaýda álemge tanymal sportshylardyń qatysýymen aptalyq ótedi
Bul týraly oblystyq qoǵamdyq kommýnıkatsııa ortalyǵynda ótken brıfıngte «Naiza» lıgasynyń prezıdenti Nurbek Qarabala málimdedi.
Onyń aıtýynsha, sportty damytýǵa arnalǵan «Naiza Sport Week» aptalyǵy 11-15 shilde aralyǵynda ótedi. Sharany qalanyń kez kelgen turǵyny tamashalaı alady.
Shara aıasynda óńirdiń beldi chempıondary, sportshylary men jattyqtyrýshylarynyń qatysýymen túrli sheberlik saǵaty, ashyq jattyǵýlar men motıvatsııalyq kezdesýler ótedi.
Olardyń qatarynda UFC sheberleri Shavkat Rahmonov, «DAR Team» komandasynyń koýchtary - Azız Razyev pen Edýard Bazrov bar.
Sondaı-aq, «Naiza» lıgasynyń chempıondary - Álibı Ydyrys, Nıkolaı Samýsev, Ildar Qudaıbergenov, pankratıonnan álem chempıony Muratbek Qasymbaı, Ǵalymjan Jasulanovta qatysady.
«Naiza» lıgasynyń aptalyqty ótkizýdegi negizgi maqsaty - Mańǵystaý óńiriniń týrıstik potentsıalyn arttyrý, Aqtaý qalasy jastarynyń sportqa degen qyzyǵýshylyǵyn oıatý.
Al Mańǵystaý oblystyq sport basqarmasynyń basshysy Qanat Jumabaevtyń aıtýynsha, aptalyq aıasynda oblystyq basketbol federatsııasynyń qoldaýymen regboldan oıyn jáne «Run Club Aktau» klýbynyń qatysýymen teńiz jaǵalaýynda júgirýden jarys uıymdastyrylady.
Teńiz jaǵasynda júgirýge nıet bildirgen barlyq adam qatysa alady.
Odan bólek, «Eagle fc» lıgasynyń prezıdenti Shamıl Zavýrovtyń sheberlik saǵaty ótedi.
Sonymen qatar, 15 shilde kúni QR Prezıdenti janyndaǵy jastar saıasaty keńesiniń múshesi, jas kásipker Damır Amanjoldyń qatysýymen forým uıymdastyrylady.
Týrnırdiń qurmetti qonaǵy - UFC chempıony Habıb Nýrmagomedov.