Aqtaýda aqparattyq-kommýnıkatsııalyq ónimderdi ázirleýmen aınalysatyn IT-hab ashylady

AQTAÝ. QazAqparat - Aqtaýda IT-hab ashylady. Bul týraly Óńirlik kommýnıkatsııalar ortalyǵynda ótken brıfıngide oblystyq tsıfrlyq tehnologııalar basqarmasynyń basshysy Aıdyn Hadıev málim etti, dep habarlaıdy QazAqparat tilshisi.

IT - hab qurý oblystaǵy tsıfrlandyrý deńgeıin arttyryp, aqparattyq-kommýnıkatsııalyq ónimderdi ázirleýge kómektesedi.

«IT mamandaryn oqytyp, jańa jobalar men startaptardy júzege asyrý úshin granttardy bólip, jańa jumys oryndaryn qurý kózdelip otyr. Túpki nátıje – naryqqa sapaly ІT mamandardy daıyndap óńirimizdegi tsıfrlandyrýdy joǵary deńgeıge jetkizý. Bul salanyń damýy Mańǵystaýdyń startaperlerine ınvestıtsııalardy tartýǵa, ónimderin halyqaralyq deńgeıge shyǵarýǵa paıdaly bolmaq», - dedi Aıdyn Hadıev.

Sondaı-aq, brıfıng barysynda spıker tsıfrlandyrý salasynda atqarylǵan jumystar týraly aıtyp ótti.

2020-2022 jyldar aralyǵynda «250+» baǵdarlamasyna engizilgen 18 aýyldyq eldi mekende talshyqty-optıkalyq baılanys jelileri (TOBJ) tehnologııasy boıynsha ınternet jáne 4G mobıldi ınternet tolyq iske qosylǵan. Nátıjesinde Tájen, Qulandy, Senek, Ońdy, Jyńǵyldy, Tuşyqudyq, Shaıyr, Shebir, Aqshymyraý, Qyzan, Batyr aýyly keń jolaqty ınternetke qosylǵan. Búginde Aqtaý men Jańaózen qalasyn eseptemegende, oblysta uıaly baılanys operatorlarynyń 174 bazalyq stantsııalary qyzmet atqarady.