Aqtaýda adamdardy bopsalaýmen aınalysatyn qylmystyq top anyqtaldy
Mańǵystaý oblysy PD uıymdasqan qylmysqa qarsy kúres basqarmasynyń qyzmetkerleri jedel-izdestirý is-sharalaryn ótkizý kezinde Aqtaý qalasynyń «Korablık» bıznes ortalyǵynyń artyndaǵy avtojolda Toyota Camry avtokóligin toqtatyp, bopsalaý faktisine kúdikti 26 jastaǵy júrgizýshisi men 27 jastaǵy onyń jolaýshysyn ustady.
Jábirlenýshiniń aıtýynsha, bir top adamdar ony birneshe ret urlap, uryp-soǵyp, atys qarýyn qoldanamyn dep qorqytyp, 500 myńteńge talap etken, sondaı-aq jábirlenýshige tıesili avtokólikti alyp ketken. Polıtseıler avtokólikti tintý barysynda patrondary bar «PM» markaly jaýyngerlik tapanshany taýyp, tárkiledi. Kúdiktilerdiń ýaqytsha turǵylyqty jerin tintý barysynda biriniń páterinde birneshe jaýyngerlik jáne travmatıkalyq oq-dáriler tabylyp, tárkilendi. Basqa eki mekenjaı boıynsha tintý kezinde 3 bopsalaý deregine kúdiktiler anyqtaldy. Olardyń turǵylyqty jerinen polıtseıler taǵy bir tapansha, eki myltyq pen oq-dáriler tárkiledi.
Mekenjaılardyń birinen Opel Vectra kóligi tabyldy. Ony ustalǵandar jábirlenýshiden kúshpen tartyp alǵany belgili boldy. Bopsalaý jáne qarýdy saqtaý faktileri boıynsha sotqa deıingi tergeý amaldary júrgizilip jatyr. Kúdiktiler óz áreketterin moıyndady.
Qylmys jan-jaqty tekserilýde.