Aqtaýda «abysyn-ajyn» saıysy ótti
AQTAÝ. KAZINFORM — Saıys respýblıkalyq deńgeıde uıymdastyrylyp, oǵan Mańǵystaý men Atyraý oblystarynan 70-ke jýyq adam qatysty.
Sharanyń maqsaty — bir otbasyndaǵy kelinderdiń ónegeli qarym-qatynasyn kórsetý, urpaqqa otbasy birligin, salt-dástúrdi, ádet-ǵurypty nasıhattaý.
— Urpaqtar sabaqtastyǵyn nasıhattaý kerek. Jol kórsetetin myna bizder — analarmyz. Bul sharaǵa kelgenime óte qýanyshtymyn. Kóp oı túıip jatyrmyz. Bilmegenimizdi bilip jatyrmyz. Úlken býynnan úırenerimiz kóp. Keıingi býynǵa bereremiz de kóp dep esepteımin, — deıdi Atyraý oblysynyń turǵyny Armangúl Asqarova.
«Abysyn-ajyn» baıqaýy oblysta osymen 4-shi ret ótip otyr. Qatysýshylar aldymen amandasyp, ónerin, sheberligin kórsetti. Sodan soń ádet-ǵurypqa baılanysty suraqtarǵa jaýap berip synǵa tústi.
- Mańǵystaý salt-dástúrdiń qaımaǵy buzylmaǵan ólke. Sol búgingi sharada kórinis taýyp jatyr. Biz baıqaý arqyly tatýlyqty tý etken, bir úıdiń, búkil áýlettiń tútinin tútetip otyrǵan jas kelinderdiń, jas analardyń ómir saltyn kórsete otyryp, otbasy tatýlyǵyn nasıhattaımyz, — deıdi saıysty uıymdastyrýshy, qoǵam belsendisi Bıbigúl Ramazanova.
Baıqaýdyń qorytyndysy boıynsha bas júldege Mańǵystaý aýdanynan qatysqan Bekmaǵulovtar áýletiniń kelinderi ıe boldy. Jeńimpazdarǵa 300 myń teńge berildi.
