Aqtaýda 85 jastaǵy ájeı ýnıversıtette oqyp júr
AQTAÝ. KAZINFORM — Aqtaýda Yessenov University-de aqpan aıynan bastap «Kúmis ýnıversıteti» jobasy aıasynda egde jastaǵy adamdardy oqytý bastaldy. Atalǵan týrıstik kýrs gıd-ekskýrsovodtardy daıyndaýǵa bastalǵan.
Úsh aılyq kýrstyń sońynda Kúmis ýnıversıtetiniń túlekteri sertıfıkattar alyp, Mańǵystaý oblysynyń týrızm basqarmasymen memorandým aıasynda óńirge demalysqa keletin týrıster úshin ekskýrsovod retinde jumysqa ornalasady.
Qazirgi ýaqytta munda egde jastaǵy 70-den astam tyńdaýshy bilim alyp júr.
Solardyń qatarynda aqtaýlyq 85 jastaǵy Lıýdmıla Kýleshova da bar.
«Kúmis ýnıversıtette» oqý arqyly gıd-ekskýrsovod bolý úshin partaǵa qaıta otyrdym. Mańǵystaýda týyp-óstim. Sondyqtan óńir boıynsha ómirlik tájirıbem mol. «Kúmis ýnıversıtet» — zeınetkerler úshin óz kókjıegin keńeıtýge, bilimin kórsetýge, ekskýrsııaǵa barýǵa jáne ólkemizdiń sheksiz sulýlyǵyn kórýge tamasha múmkindik bolyp otyr», — deıdi Aqtaý qalasynyń turǵyny Lıýdmıla Kýleshova.
Mańǵystaý oblysynda jyl saıyn týrıster sany artyp otyrǵany baıqalady. Byltyr qazan aıyna deıin óńirge 325 myńnan astam týrıst kelgen.
Osy oraıda gıdterge degen suranys artyp otyr.
«Elimizde 2021 jyldan bastap „Kúmis ýnıversıteti“ jobasy qolǵa alynyp, joǵary býyn ókilderine túrli baǵyttar boıynsha bilim men daǵdylardy alýǵa múmkindik berilip otyr. Bul rette arnaýly kýrs gıd-ekskýrsovod mamandardy daıarlaýǵa úles qosady», — deıdi Yessenov University ókilderi.