Aqtaýda 8 jastaǵy bala túzetý ortalyǵynyń terezesinen qulap, qaza boldy
AQTAÝ. KAZINFORM — Aqtaýlyq 8 jasar Nuraly Rýhlamınov úshinshi qabatta ornalasqan túzetý ortalyǵynyń terezesinen qulap, eki aı aýrýhanada jatyp, kóz jumdy.
Oqıǵa 2026 jylǵy 27 naýryzda Aqtaý qalasynda boldy. Túzetý ortalyǵy 24-shaǵyn aýdandaǵy «Boıtumar» jeke balabaqshasy ornalasqan ǵımarattyń úshinshi qabatynda jumys istegen. III toptaǵy múgedektigi bar, ekijaqty týabitti estý qabileti buzylǵan bala sol ortalyqtyń terezesinen qulap ketken. Saldarynan aýyr dene jaraqatyn alyp, oblystyq balalar aýrýhanasyna jetkizilgen. Dárigerler balanyń aıaq-qoldary, jambas súıekteri, omyrtqasy men ishki aǵzalary zaqymdanǵanyn aıtady.
Balanyń jaǵdaıy nasharlaýyna baılanysty ony 17 sáýirde sanıtarlyq avıatsııamen Almatydaǵy Pedıatrııa jáne balalar hırýrgııasy ǵylymı ortalyǵyna jetkizgen. Biraq, dárigerlerdiń barlyq kúsh-jigerine qaramastan, bala 20 mamyr kúni kóz jumdy.
Atalǵan derek boıynsha Qylmystyq kodekstiń 141-baby boıynsha qylmystyq is qozǵaldy. Marqumnyń atasy ári qamqorshysy Maqsat Dáýletov oqıǵany jan-jaqty tergep, jaýaptylardy anyqtaýdy suraıdy. Ol usynǵan beınebaqylaý kameralaryndaǵy jazbada oqıǵa aldynda bólmede úsh balanyń eresekterdiń qaraýynsyz qalǵany kórinedi.
Mańǵystaý oblysy boıynsha bala quqyqtary jónindegi ýákili Tilektes Bolatbaevanyń málimetinshe, osy oqıǵa boıynsha Aqtaý qalalyq bilim bólimi janynan komıssııa qurylyp, tekserý jumystary júrgizilgen. Nátıjesinde, túzetý ortalyǵynda qaýipsizdik máseleleri qarastyrylmaǵany, terezege temir tor ornatylmaǵany jáne balalar qaraýsyz qalǵany anyqtalǵan.
— Jekemenshik balabaqsha eshqandaı kelisimshartqa otyrmaı, ózara resmı qujat jasaqtamaı, úshinshi qabatty túzetýi ortalyǵyna berýi negizinde zańsyz. Bul ortalyqtyń resmı qujattary bolmaǵan, daıyn mamandary da bolmaǵany anyqtaldy. Tergeý júrip jatyr. Bul jumys aıaqtalǵan joq. Túzetý ortalyǵy 28 naýryz kúni jumysyn toqtatty, úshinshi qabat bos tur, — deıdi bala quqyqtary jónindegi ýákili Tilektes Bolatbaeva.
Buǵan deıin, Mańǵystaýda aýladan 12 jastaǵy balanyń denesi tabylǵan bolatyn.
