Aqtaýda 700 otbasyǵa qaıyrymdylyq kómek kórsetildi

AQTAÝ. QazAqparat – Aqtaýda az qamtylǵan 700-den astam otbasyǵa qaıyrymdylyq kómek kórsetildi, dep habarlaıdy QazAqparat tilshisi.

«Biz – adambyz, biz – birgemiz» qoǵamdyq qorynyń uıymdastyrýymen ótken qaıyrymdylyq sharasynda kópbalaly, áleýmettik jaǵdaıy tómen otbasylarǵa kıim-keshek, aıaq kıim, azyq-túlik, oıynshyqtar, turmysqa qajetti zattar tegin úlestirildi.

«Biz aldyn ala quzyrly mekemelerden tizimdi alyp, jaǵdaıy eń tómenderdi tańdap aldyq. Sharaǵa kásipkerler, ákimdik demeýshilik kórsetti. Sonymen qatar, jomart jandar qol ushyn sozyp, turǵyndar úıindegi artyq zattaryn alyp keldi. Sizder de áli úles qosa alasyzdar. 32 V shaǵynaýdan, 12-úıdiń artyndaǵy jertólege artyq zattaryńyzdy alyp kelseńizder bolady. Sebebi, apta saıyn osynda kómekke muqtaj otbasylar kelip, olardy alyp ketedi»,-deıdi qor basshysy Iman Dosmýhamedov.