Aqtaýda 7-Qysqy Azıada alaýynyń estafetasy ótti
AQTAÝ. 17 Qańtar. QazAqparat /Anargúl Jeksembaı/- Keshe Aqtaý qalasynda 7-Qysqy Azıada alaýynyń estafetasy ótti. Saǵat kúndizgi 12-de «Máńgilik alaý» monýmentiniń janynda ótken sharaǵa qala turǵyndary da qatysty.
Saltanatty túrde tabys etilgen alaýdy mańǵystaýlyq sportshy Erdos Jańabergenov qabyldap aldy. Erdos bokstan álem chempıony, sporttan Qazaqstan Respýblıkasynyń eńbek sińirgen sheberi.
Qala kósheleri boıymen alyp ótken 60 adamnan turatyn alaýgerlerdi turǵyndar jol jıeginen qarsy alyp otyrdy. Olardy qoldap qolpashtaǵan jastar qýanyshty únmen daýystady. 200 metr qashyqtyqty júgirip ótkender arasynda qala ákimi men sportshylar, óner adamdary da boldy. Uıymdastyrýshylardyń aıtýynsha, alaý estafetasy Qazaqstannyń barlyq aımaǵyndaǵy buqaralyq sporttyń qaryshtaýyna septigin tıgizedi. Bul sharanyń maqsaty - qysqy Azııa oıyndaryna halyq nazaryn aýdartý, barlyq óńirdegi jurtshylyqqa Estafeta alaýyn tamashalatý arqyly olımpıada dástúrin saqtaý.
Estafeta Aqtaý qalasynyń Astana alańynda máresine jetip, merekelik otshashý jáne kontserttik baǵdarlamamen ulasty. Búgin Estafeta Atyraý oblysynda jalǵasady.
