Aqtaýda 600 mln teńgege jýyq zańsyz satyp alýdyń joly kesildi
ASTANA. KAZINFORM — Mańǵystaýda bıýdjet qarajatyn negizsiz jumsaý derekteri áshkerelendi, dep habarlaıdy oblystyq prokýratýranyń baspasóz qyzmeti.
Mańǵystaý oblysynyń prokýratýrasy sybaılas jemqorlyqqa qarsy zańnama talaptaryn buzý faktilerin anyqtady.
— Atap aıtqanda, Aqtaý qalalyq turǵyn-úı komýnaldyq sharýashylyq bóliminiń basshysy zańsyz bir kózden 592 mln tg memlekettik satyp alýdy júzege asyrǵan. Budan basqa, Aqtaý qalalyq qurylys bóliminiń basshysy men Beıneý aýdany Turysh aýylynyń ákimi oryndalmaǵan jumystar úshin 29,5 mln tg bıýdjet qarajatyn tólegen. Prokýratýra aktisiniń negizinde zań buzýshylyqtar joıyldy, — delingen habarlamada.
Sonymen qatar atalǵan laýazymdy tulǵalar memlekettik qyzmetke kir keltiretin tártiptik teris qylyqtary úshin, atqaryp otyrǵan laýazymdaryna tolyq sáıkes emestigi týraly eskertý túrindegi jaýaptylyqqa tartyldy.
Buǵan deıin kvazımemlekettik sektordaǵy memlekettik satyp alý erejelerine ózgeris engizilgenin jazdyq.
