Aqtaýda 6 sáýirden bastap óńiraralyq reıster toqtaıdy
6 sáýirde sońǵy reıs - Kókshetaý-Aqtaý-Kókshetaý toqtaıdy. Búgin Atyraýǵa aparatyn reıster jabyldy. Jalpy, bul jaǵdaı elimizde tótenshe jaǵdaı aıaqtalǵansha, ıaǵnı 15 sáýirge deıin jalǵasady.
«Ázirge SCAT kompanııasynyń baǵyttary ǵana qaldy. Biz - syrtqy jáne ishki reısti toqtatqan eń sońǵy áýejaımyz. Barlyǵy sáýir aıynyń ortasyna deıin ǵana toqtatylady dep senemiz. 31 naýryzdan 14 sáýirge deıin Aqtaý-Aqtóbe-Aqtaý baǵyty ýaqytsha oryndalmaıdy. 3 sáýirden 12 sáýirge deıin Aqtaý-Atyraý-Oral-Atyraý-Aqtaý baǵyty jabylady. 6 sáýirden 15 sáýirge deıin Kókshetaý-Aqtaý-Kókshetaý baǵyty ushpaıdy» delingen habarlamada.
«Úkimettik komıssııanyń qaýlysy boıynsha, endi tek júk tasymaldaıtyn ushaqtardy qabyldaı alamyz jáne áskerı ushaqtar ushýy múmkin. Olar memlekettiń tapsyrmasymen ushady»,-deıdi Aqtaý halyqaralyq áýejaıynyń dırektory Erǵazy Joldasov.
Dırektordyń aıtýynsha, barlyq ushaq jolaýshylaryn arnaıy kıim kıgen epıdemıolog mamandar qarsy alyp, teplovızormen tekserip jatyr. Jolaýshylardyń tizimi alynyp, onyń qaıdan, qashan otyrǵany jazyp alyndy.
Aıta keteıik, 27 naýryz kúni Aqtaý áýejaıynda barlyq halyqaralyq áýe reısteri toqtaǵan bolatyn.