Aqtaýda 6 myńǵa jýyq adam «Erlikke taǵzym» etti
Búginde Mańǵystaý oblysynda soǵysyna qatysqan 22 ardager jáne 928 tyl ardageri bar. Jeńisti jaqyndatqan maıdangerler Aqtaý qalasynda uıymdastyrylǵan merekelik sharada tórden oryn alyp, aıtýly kúndi toılaýǵa arnalǵan meıramnyń qonaǵy boldy.
Bıyl Uly Jeńiske - 73 jyl. Qaıǵysy men zili - beıbit ómirdiń shyrqyn buzyp, qanshama adamnyń ómirin jalmaǵan zulmat soǵystyń aıaqtalyp, Jeńis týynyń jelbiregen kúni. Janqııar erliktiń, eńseli eldiktiń rýhy órlegen kún. Erlik jalaýy jelbiregen shaq. Táýelsizdik tuǵyrynyń berik, elimizdiń gúldenýi osynaý merekeniń jemisi. Mańǵystaýlyqtar Jeńis kúnin saltanatpen atap ótti.
Ortalyq kósheden Máńgilik alaý monýmentine deıin qamtylǵan sharada eskertkishke gúl shoqtary qoıylyp, bir mınýt únsizdik oryn aldy. Sodan keıin qala turǵyndary men qonaqtaryna «Eshkim de, eshteńe de umytylmaıdy» atty teatrlyq jáne kontserttik baǵdarlama usynyldy. Saltanatty rásimde Mańǵystaý oblysynyń ákimi Eraly Toǵjanov jınalǵan jurtshylyqty Jeńistiń 73 jyldyq mereıtoıymen quttyqtady.
«Elbasymyz, Qazaqstan Respýblıkasynyń Qarýly Kúshteriniń Joǵarǵy Bas qolbasshysy Nursultan Nazarbaev «Otan qorǵaýshylar kúnine» arnalǵan áskerı paradta - «Qarýly Kúshter - bul qaýipsizdiktiń basty kepili, egemendiktiń berik irgetasy jáne bizdiń Otanymyzdyń beıbitshiligi men tynyshtyǵy» degen bolatyn. Búgingi naqty qaýipterge, terrorızmge jáne kútpegen álemdik ekonomıkanyń qıyndyqtaryna qaramastan, biz eldiń turaqtylyǵyn baǵalap, etnıkaaralyq beıbitshilik pen Qazaqstan halqynyń birligin baǵalaýymyz kerek. Sondaı-aq, bizdiń ardagerlerimizdiń Táýelsiz Qazaqstannyń qalyptasýy men damýyna qosqan úlesiniń zor ekenin atap ótkim keledi. Olardyń eren erligi men kózsiz batyrlyǵy biz úshin batyldyq pen tabandylyqtyń, borysh pen adaldyqtyń jarqyn úlgisi boldy. Mańǵystaý oblysynyń árbir tórtinshi turǵyny, ıaǵnı 6000-nan astam adam, Otanyn qorǵaý úshin soǵysqa shaqyrtyldy. Olardyń 4800-i shaıqasta qaza taýyp, iz-tússiz joǵaldy. Qazir bizdiń oblysta 22 soǵys ardageri jáne 928 tyl eńbekkeri bar. Olardyń barlyǵy memleket qamqorlyǵynda», - dedi oblys ákimi Eraly Toǵjanov.
Sharaǵa kelgen tyl ardageri Aqilgek Oraqova sol jyldardyń qıyndyǵyn aıtyp, merekemen quttyqtady.
«Jeńis kúni aǵa urpaqtyń erligin máńgilik elde saqtaýǵa arnalǵan eń qasterli mereke. Bul aǵa býynnyń jan qııar erligi men eseli eńbeginiń jemisi. Qaharman qaısarlyqtyń qas úlgismin kórsetken qaısar rýh pen jalyndy jigerdiń jemisi! Bilektiń kúshimen, naızanyń ushymenen myna eldi qorǵap qalǵan azamattardyń qazirgi azamattar sonyń jolyn qýsyn. Elimiz aman bolsyn! Aman bolaıyq! Baldardyń densaýlyǵy myqty bolsyn!»,-dedi.
Sonymen qatar, aımaq basshysy Jeńis kúnin toılaýǵa kele almaǵan ardagerler Faýdjı Jalmuhanova men Vasılıı Lazarenkonyń úıine arnaıy baryp, merekemen quttyqtady. Sondaı-aq, oblys ákimi Ekinshi dúnıejúzilik soǵystyń 6 ardagerine, 10 tyl qyzmetkerine, 3 jaýynger-ınternatsıonalıstke jáne Chernobyl AES apatynyń saldaryn joıýǵa atsalysqan 3 azamatqa saltanatty túski asqa shaqyrdy.
Merekede aımaq basshysy Jańaózen qalasyndaǵy UOS ardagerlerin de arnaıy quttyqtady.
Ekinshi Dúnıejúzilik soǵysqa qatysqan Keńesbaı Ensegenovke oblys ákimi Eraly Toǵjanov jańa páter kiltin tabys etti. Ardager II dárejeli Otan soǵysy ordeni, «Eńbek ardageri» medali, ІІ dárejeli «Dańq ordeni» ordeni, «Erligi úshin» medaldarymen marapattalǵan.
