Aqtaýda 50 myń sharshy metr aýmaqqa kógal otyrǵyzylmaq
Osy ýaqytqa deıin shaharda kóktem aılarynda jas taldar men gúl ǵana otyrǵyzylatyn. Al, bıyl taldardy az otyrǵyzyp, burynǵyny saqtaý men barlyǵyn kútip baptaýǵa erekshe kóńil bólinbek.
Aqtaý qalalyq ákimdigi baspasóz qyzmetiniń habarlaýynsha, qalaǵa tek 200-den astam shyrsha tárizdes taldar men ortalyq kóshelerge bir jyldyq gúlder men raýshan gúlderi otyrǵyzylýda.
«Sonymen qatar, bıyl jasyl-jelekti ýaqtyly sýarýǵa da den qoıylýda. Sebebi, bul másele qala ákiminiń baqylaýynda. Ǵalymjan Nııazov kún saıyn kógaldandyrý men abattandyrý boıynsha esep alyp otyr. Turǵyndardyń da shaǵymy jiti qadaǵalanýda. Ár senbi saıyn shahardy aralap, mamandarǵa tıisti tapsyrmalardy júktep otyr»,-delingen habarlamada.
Bıyl shahardyń jasyl jelegin jaı̆qaltý maqsatynda sýarý úshin únemdi tásilder engizilýde. Ár aǵashtyń túp tamyryna sýarýdyń ózindik arnaı̆y, jańa tehnologııalyq ádisteri paı̆dalanylmaq. Gúl men gazon egilgen jerlerge sprınklerlyq, ıaǵnı jańbyrsha shashyratyp sýarý ádisi qosylǵan. Aldymen, «Tobanııaz» saıabaǵyna qoldanyldy.
«Aldaǵy ýaqytta búrkip shashý ádisi, ıaǵnı avtomatıkalyq sý júıesi barlyq saıabaqtarǵa qoıylady. Tańerteń jáne keshke sýaratyn bolady. Jalpy, shahar boı̆ynsha 50 myń sharshy metr aýmaqty kógaldandyrý josparlanyp otyr.
Qala aýmaǵynda 3 jáne 5 tekshe metrlik qutylar ornatylýda. Olarǵa únemi sý toltyrylyp, sonyń arqasynda kók shópter men gúldesteler árdaı̆ym sýǵa qanyp turady.
«Múgedekterdi qoldaý qoǵamy «Atameken» QB jaqynda ǵana áýejaı̆ jolyna osyndaı̆ eki sý bóshkesin ornatty. Al, qala ishindegi shaǵyn aýdandardaǵy taldar, sý tasymaldaýshy kólikter arqyly sýarylady»,-deıdi Aqtaý qalalyq turǵyn-úı kommýnaldyq sharýashylyǵy bóliminiń basshysy Qaırat Aqybaev.
Kógaldandyrý jumystaryna 150-den astam jumysshy jumyldyrylǵan.
Qazirgi tańda jumysshylar saıabaqtaǵy bar aǵashty sýaryp, aýyryp turǵan aǵashtardy emdep, tamyryna qurt túsken taldardy ákteý jumystaryn atqarýda.
