Aqtaýda 48 mlrd teńgege jańa qazandyq salynady: Qanat Bozymbaev ınfraqurylym jobalaryn tekserdi
ASTANA. KAZINFORM — Premer-mınıstrdiń orynbasary Qanat Bozymbaev Mańǵystaý oblysyna jumys saparynda Aqtaýdaǵy sý, jylý jáne elektr ınfraqurylymyn jańǵyrtý jobalarymen tanysty. Qalada quny 48 mlrd teńge bolatyn jańa qazandyq salý josparlanyp otyr. Bul týraly Úkimettiń baspasóz qyzmeti málim etti.
Sapar barysynda halyqty aýyz sýmen qamtamasyz etý máselesine erekshe nazar aýdaryldy. Qanat Bozymbaev «Kaspıı» sý tuşytý zaýytynyń jumysymen tanysty. 2025 jyly júrgizilgen keńeıtý jumystarynyń nátıjesinde kásiporynnyń óndiristik qýaty táýligine 40 myń tekshe metrge deıin artty. Zaýyt Aqtaý qalasynyń joǵarǵy shaǵynaýdandaryn, sondaı-aq Munaıly jáne Qaraqııa aýdandarynyń eldi mekenderin aýyz sýmen qamtamasyz etedi.
— Óńirdegi ózekti máselelerdiń biri — Kaspıı teńizi deńgeıiniń tómendeýi. Bul Mańǵystaý atom energetıkalyq kombınatynyń (MAEK) turaqty jumysyna qaýip tóndirýde. Osyǵan baılanysty JEO-1 jáne JEO-2 sý qabyldaý arnalaryn tereńdetý jáne uzartý jobalary júzege asyrylyp jatyr. Vıtse-premer atalǵan jumystardyń barysymen tanysty. Jobalar Aqtaý qalasyn elektr jáne jylý energııasymen qamtamasyz etetin kombınatqa óndiristik qajettilikter úshin teńiz sýynyń úzdiksiz jetkizilýin qamtamasyz etýge baǵyttalǵan, — delingen habarlamada.
Kommýnaldyq ınfraqurylymdy jańǵyrtý jumystary «Kaspıı jylý, sý arnasy» kásipornynda qaraldy. Kásiporyn teńgerimindegi jylý jelileriniń tozý deńgeıi 65%, sý qubyry jelilerinde — 58%, káriz jelilerinde 69%-dy quraıdy.
«Energetıkalyq jáne kommýnaldyq sektorlardy jańǵyrtý» ulttyq jobasy (EKSJ) aıasynda Aqtaý qalasynyń 4 jáne 5 shaǵynaýdandarynda 41 shaqyrymnan astam jylý jelisin rekontsııalaý kózdelgen. Qurylys-montaj jumystarynyń quny shamamen 21,8 mlrd teńgeni quraıdy. Jobalardy 2027 jyly aıaqtaý josparlanǵan. Sonymen qatar ınjenerlik jelilerdiń jumysyn 63 baqylaý núktesinde qadaǵalaýǵa múmkindik beretin tsıfrlyq dıspetcherleý júıesi engizilip jatyr.
Qanat Bozymbaev jylýmen jabdyqtaý máseleleri aıasynda Aqtaý qalasynyń alty shaǵyn aýdanyna arnalǵan jańa aýdandyq qazandyq jobasymen tanysty. Qazirgi ýaqytta qaladaǵy jylý qýatynyń tapshylyǵy saǵatyna 130 Gkal-dy quraıdy. Quny 48 mlrd teńge bolatyn joba qalanyń ósip kele jatqan jylý qajettiligin qamtamasyz etýge baǵyttalǵan.
Elektrmen jabdyqtaý ınfraqurylymyn jańǵyrtý jumystary da nazardan tys qalmady. Vıtse-premer «Mańǵystaý óńirlik elektrtoraptyq kompanııasy» AQ-da bolyp, júzege asyrylyp jatqan ınvestıtsııalyq jobalarmen tanysty. 2012–2026 jyldary kásiporyn elektr jelilerin jańartýǵa 63,5 mlrd teńge baǵyttaǵan. Osy kezeńde 60 qosalqy stansa jańǵyrtylyp, bes jańa stansa salyndy jáne 273 shaqyrym elektr jetkizý jelisi tartyldy. Ulttyq joba aıasynda elektr jelilerin qaıta jańartýǵa arnalǵan taǵy eki joba kelisilgen.
Jumys saparynyń qorytyndysy boıynsha Qanat Bozymbaevtyń tóraǵalyǵymen Mańǵystaý oblysynyń áleýmettik-ekonomıkalyq damý máseleleri jóninde keńes ótti.
Jıynda óńir ekonomıkasyn ártaraptandyrý jáne turaqty ósimdi qamtamasyz etý maqsatynda ázirlengen Master-jospar qaraldy. Qujat logıstıka, ónerkásip, teńiz ınfraqurylymy, aýyl sharýashylyǵy, týrızm jáne áleýmettik salalarda iri ınvestıtsııalyq jobalardy júzege asyrýdy kózdeıdi.
Qatysýshylar Master-jospardyń negizgi baǵyttaryn, usynylǵan jobalardyń ekonomıkalyq negizdiligin jáne olardy júzege asyrý tetikterin talqylady.
Eske sala keteıik, buǵan deıin QR Premer-mınıstriniń orynbasary Qanat Bozymbaev óńirlerdegi kommýnaldyq jobalardy jedeldetýdi tapsyrǵan bolatyn.
