Aqtaýda 40 myń tonna ónim saqtaıtyn kóterme-taratý ortalyǵy ashyldy
AQTAÝ. KAZINFORM – Kóterme-saýda ortalyǵy Aqtaý qalasyndaǵy 36-shaǵyn aýdanda ornalasqan. Memleket basshysynyń tapsyrmasymen júzege asyrylǵan joba ınvestorlardyń qarjysyna salyndy. Investıtsııalanǵan qarajat kólemi 4 mlrd teńgege jýyq.
Kóterme-taratý ortalyǵyndaǵy aýyl sharýashylyǵy ónimderin saqtaıtyn 4 qoıma paıdalanýǵa berildi. Aýdany 8 gektardy quraıtyn aýmaqta 10 693 tonnaǵa arnalǵan qurǵaq qoıma men 30 myń tonnalyq klımattyq qoımalar daıyn. Bul ortalyq azyq-túliktiń 80% astamy syrttan tasymaldanatyn óńirdegi birqatar máseleni sheshýge múmkindik beredi.
- Mańǵystaý oblysynda azyq-túlik qaýipsizdigin qamtamasyz etý – negizgi máselelerdiń biri. Memleket basshysy Qasym-Jomart Toqaev óńirimizge kelgen saparynda ólkemizdiń ereksheligine asa mán bere otyryp, «Azyq-túlik taýarlarynyń baǵasyn tómendetý boıynsha sharalar qabyldaý, onyń ishinde saýda ınfraqurylymyn damytý jáne basqa óńirlerdegi taýar óndirýshilermen uzaq merzimdi sharttar jasaýǵa» qatysty birqatar tapsyrmasyn bergen bolatyn. Osyǵan oraı iri ortalyqty salatyn ınvestor taýyp, olarǵa barynsha qoldaý kórsettik. Atap aıtqanda ortalyq qurylysyna jer telimin berdik, sondaı-aq jobany iske asyrý úshin ekinshi deńgeıli banktegi nesıe syıaqy mólsherlemesin tómendetý arqyly máseleni sheshýge jumys jasadyq. Joba tolyqqandy iske qosylǵannan keıin kásipkerdiń shyǵyny sýbsıdııalanady. Búgin biz elimizdegi eń iri joba – Aqtaý kóterme saýda ortalyǵynyń 1-shi kezeńiniń iske qosylýynyń kýási bolyp otyrmyz. Bul, elimizdegi ózge oblystardyń kásipkerlerine, ólkemizdiń kásipkerlerine zor múmkindik beredi. Óz kezeginde naryqta azyq-túlik taýarlarynyń kóbeıýine jáne onyń baǵasyn turaqtandyrýǵa yqpal etedi, - deıdi Mańǵystaý oblysynyń ákimi Nurdáýlet Qılybaı.
Jobanyń ekinshi kezeńi aıasynda eki qabatty kóterme saýda bazary salynýda. Jumys 90 paıyz oryndaldy.
Qurylysty 2024 jyldyń ekinshi jartyjyldyǵynda aıaqtaý josparlanýda. Saýda bazary iske qosylǵan soń, jergilikti aýyl sharýashylyǵy óndirýshilerine saýda oryndary berilmek. Bul óz kezeginde ónimdi deldalsyz satýǵa múmkindik jasap, sol arqyly tutynýshylar úshin baǵany turaqtandyrýǵa oń áser etpek.
