Aqtaýda 4 kún buryn joǵalǵan 2 adamnyń týystary kómek surady

AQTAÝ. QazAqparat - Aqtaýda 5 shilde kúni «Shora» kanalyna shomylýǵa ketip, qaıtyp oralmaǵandar adamdardyń týystary kópshilikten kómek surady, dep habarlaıdy QazAqparat tilshisi.

Shomylýǵa ketip, oralmaǵan Tolbaı Serik pen Ábýǵalı Erkebulannyń týysy Salamat Búrkitov izdeý jumystaryna eriktilerdiń kerek ekenin aıtty.

«Bizge vodolaz, kater, tikushaq, dron, jalpy izdeýge qajetti quraldar men tehnıkalar aýadaı qajet. Dúrbisi bar adamdar shyqsa, tipti jaqsy. Jalpy, teńizge shyǵyp, izdesýge adamdar kerek. Ákim qutqarýshylardyń tańnan bastap túnge deıin izdep jatqandaryn aıtty. Biraq, olardyń tańerteńgi 8-den keshki 6-ǵa deıin izdeıtinderin bildik. Sondyqtan kún batqannan keıin ózimizdiń kúshimizben izdeýdemiz»,-deıdi Salamat Búrkitov.

Eske sala keteıik, Aqtaýdan sýǵa ketken 2 adamnyń denesi tabylmaı jatqany týraly buǵan deıin jazǵan bolatynbyz.