Aqtaýda 34 mln teńgeniń altynyn aldap alǵan eki kúdikti ustaldy
AQTAÝ. KAZINFORM — Mańǵystaý oblysynyń polıtsııa qyzmetkerleri jalpy quny 34 mln teńgeden asatyn altyn buıymdardy alaıaqtyq jolmen ıemdendi degen kúdikpen eki adamdy ustady, dep habarlaıdy Polisia.kz.
Aqtaý qalasynyń 4-shaǵyn aýdanyndaǵy saýda ortalyqtarynyń birinde ornalasqan zergerlik dúkende áıel adam satýshynyń senimine kirip, alty altyn buıymdy ıemdenip, oqıǵa ornynan boı tasalaǵan.
Tergeý málimetterine sáıkes, áıel ózin dúken ıesiniń tanysynyń qyzy retinde tanystyryp, altyn áshekeılerdi jeńildikpen satyp alýdy syltaý etken. Osylaısha ol satýshyny altyn buıymdardy ózine berýge kóndirgen. Keıin taýardyń aqysyn tólemesten dúkennen shyǵyp ketken.
Jedel-izdestirý is-sharalary barysynda krımınaldyq polıtsııa qyzmetkerleri atalǵan qylmysqa Almaty qalasynan Aqtaýǵa barǵan eki azamattyń qatysy bolýy múmkin ekenin anyqtady.
24 qazanda kúdiktiler Atyraý oblysynyń Saǵyz aýyly mańynda Toyota Camry avtokóligimen óńirden ketýge árekettengen kezde ustaldy. Avtokólikti tekserý barysynda polıtsııa qyzmetkerleri 6 altyn buıymdy taýyp, tárkiledi.
Atalǵan derek boıynsha qylmystyq is qozǵaldy. Kúdiktiler ustalyp, ýaqytsha ustaý ızolıatoryna qamaldy. Tergeý jalǵasyp jatyr.
Aıta keteıik, aıaq kıiminiń ultaraǵyna 182 mln teńgeniń altynyn jasyrǵan adam ustaldy.
