Aqtaýda 30 myńǵa jýyq turǵyn salyq tólemeı júr
Bul týraly qoǵamdyq kommýnıkatsııa ortalyǵynda ótken brıfıngte Mańǵystaý oblystyq memlekettik kirister departamentiniń basqarma basshysy Madına Jaqanqyzy aıtty.
Spıkerdiń aıtýynsha, jalpy Aqtaý qalasynda 30 myńǵa jýyq turǵyn salyq tólemeı júr.
Eger 30 jumys kúniniń ishinde turǵyndar qaryzyn tolyq ótemeıtin bolsa, memlekettik organnan salyq buıryǵy daıyndalyp jeke sot oryndaýshysyna jiberiledi.
Іs jeke sot oryndaýshysyna túskennen keıin, qaryz soma tolyq ótelgenshe salyqtan jaltarýshynyń barlyq shottary buǵattalady.
Sondaı-aq, jalpy qaryz somasynan 25 paıyz kólemde jeke sot oryndaýshysynyń qyzmeti úshin de qarjy tóleıdi.
- Ár jyldyń 15 aqpanynan keshiktirilmeı azamattarǵa arnalǵan úkimet memlekettik korporatsııasynyń bergen málimetimen azamattardyń múligi esepteledi. Soǵan sáıkes, atyna múlik tirkelgen tulǵalar sol jyldyń 1 qazanynan keshiktirmeı salyq tóleýi tıis, - deıdi Madına Jaqanqyzy.
Brıfıngte sóz alǵan Aqtaý qalalyq memlekettik kirister basqarmasynyń dara kásipkerlerdi jáne jeke tulǵalardy ákimshilendirý bóliminiń basshysy Azamat Sagıdýllaev óz kezeginde qandaı tulǵalar múlik salyǵynan bosatylatynyn aıtyp ótti.
Múlik salyǵyn tóleýde bosatylatyn jeke tulǵalar:
- Keńes Odaǵynyń batyrlary, Sotsıalıstik Eńbek Erleri, «Halyq qaharmany», «Qazaqstannyń Eńbek Eri» ataqtaryna ıe bolǵan, úsh dárejeli «Dańq» ordenimen jáne «Otan» ordenimen nagradtalǵan adamdar, «Batyr ana» ataǵyna ıe bolǵan, «Altyn alqa» alqasymen nagradtalǵan kóp balaly analar, bólek turatyn zeınetkerler – menshik quqyǵynda barlyq salyq salý obektisiniń jalpy qunynan tıisti qarjy jylynyń 1 qańtarynda qoldanysta bolatyn aılyq eseptik kórsetkishtiń 1000 aılyq eseptik kórsetkish kóleminde jeńildik ala alady.
-Sondaı-aq, Uly Otan soǵysynyń qatysýshylary men múgedekteri jáne jeńildikter men kepildikter boıynsha olarǵa teńestirilgen adamdar, Uly Otan soǵysy jyldarynda tyldaǵy qajyrly eńbegi men minsiz áskerı qyzmeti úshin burynǵy KSR Odaǵynyń ordenderimen jáne medaldarymen nagradtalǵan adamdar, 1941 jylǵy 22 maýsym – 1945 jylǵy 9 mamyr aralyǵynda keminde alty aı jumys istegen (qyzmet ótkergen) jáne Uly Otan soǵysy jyldarynda tyldaǵy qajyrly eńbegi men minsiz áskerı qyzmeti úshin burynǵy KSR Odaǵynyń ordenderimen jáne medaldarymen nagradtalmaǵan adamdar, múgedekter – menshik quqyǵynda barlyq salyq salý obektisiniń jalpy qunynan tıisti qarjy jylynyń 1 qańtarynda qoldanysta bolatyn aılyq eseptik kórsetkishtiń 1500 eselengen mólsheri sheginde jeńildik ala alady, - dedi Azamat Sagıdýllaev.
