Aqtaýda 3 jasar qyzyn óltirgen áıel sot úkimin jeńildetýdi surady

AQTAÝ. QazAqparat - Aqtaýda 3 jasar qyzyn uryp óltirgen áıel sot úkimine shaǵym túsirdi. Oǵan 8 jyl bas bostandyǵynan aıyrý jazasy taǵaıyndalǵan edi, dep habarlaıdy QazAqparat tilshisi.

Mańǵystaý oblystyq sotynyń qylmystyq ister jónindegi sot alqasy balanyń densaýlyǵyna qasaqana aýyr zııan keltirip, abaısyzda ólimge ákelip soqqan qylmystyq isti apellıatsııalyq tártippen qarady.

«Birinshi satydaǵy sot úkimi boıynsha áıelge 8 jylǵa bas bostandyǵynan aıyrý jazasy taǵaıyndaldy. Úkimge jábirlenýshiniń zańdy ókili, sottalǵan adam jáne onyń advokaty apellıatsııalyq shaǵym jasady. Sottalýshynyń qorǵaýshysy isti Qylmystyq kodekstiń 106-baby (abaısyzda adam ólimine alyp kelý) boıynsha qaıta qaraýdy surady.

Apellıatsııalyq alqa birinshi satydaǵy sot úkiminiń zańdy jáne negizdi shyǵarylǵanyn, úkimdi ózgertýge, onyń kúshin joıýǵa jáne apellıatsııalyq shaǵymdardyń dálelderin qanaǵattandyrýǵa negiz joqtyǵyn anyqtady. Sondyqtan sot úkimi ózgerissiz, apellıatsııalyq shaǵymdar qanaǵattandyrýsyz qaldyryldy», - dedi Mańǵystaý oblystyq sotynyń baspasóz qyzmetinen.

Aıta keteıik, oqıǵa bıylǵy 4 qańtarda boldy. Áıel qyzyn uryp, ıterip jibergen. Іshimen ústeldiń buryshyna soǵylǵan balada gematoma paıda bolady. Birneshe kúnnen keıin áıel taǵy da ashýly kúıde qyzynyń ishinen urady. Sodan keıin qyzyn úıge tastap, ketip qalady. Birneshe saǵattan keıin qyz dene jaraqatynan qaıtys bolǵan.