Aqtaýda 29 mádenı is-shara ótedi – TÚRKSOI uıymynyń bas hatshysy Sultan Raev

AQTAÝ. KAZINFORM – «Aqtaý – Túrki áleminiń mádenı astanasy» jylynyń ashylý saltanatyna arnaıy kelgen TÚRKSOI halyqaralyq uıymynyń bas hatshysy Sultan Raev kúzge deıin aımaqta aýqymdy jıyndar men konferentsııalar ótetinin málimdedi. 

– Aqtaýdyń Túrki áleminiń mádenı astanasy mártebesin alýy tekten tek emes. Bul qala tarıhı jáne mádenı muralarǵa baı, Qazaqstannyń rýhanı ortalyqtarynyń biri sanalady. Kaspıı teńiziniń jaǵalaýynda ornalasqany óz aldyna bir bólek áńgime. Osy rette Kaspıı birneshe eldi biriktiretin mańyzdy sý aıdyny ekenin eskergenimiz jón. Osy sebepterge baılanysty 2025 jyly «Aqtaý – Túrki áleminiń mádenı astanasy» retinde tańdaldy. Teatr, kıno, klassıkalyq ónerden bastap, halyqtyq jáne beıneleý ónerine deıingi keń aýqymdy qamtıtyn 29 mádenı is-sharany ótkizýdi josparlap otyrmyz, - deıdi TÚRKSOI halyqaralyq uıymynyń bas hatshysy Sultan Raev.

Onyń sózinshe, «Aqtaý – Túrki áleminiń mádenı astanasy» jylynyń ashylý saltanatyna asa mán berilip jatyr. Atalǵan is-sharaǵa túrkitildes elderdiń 1 400-ge jýyq mádenıet qaıratkeri qatysady. Sonymen qatar shyǵys elderiniń 400-den astam ónerpazy óner kórsetedi. 

Aıta keteıik, buǵan deıin Aqtaýda 25 myń adam jınalatyn ǵalamat shoý ótetini týraly jazǵan bolatynbyz. 

Sonymen qatar Aqtaýdaǵy kontsertte Dımash Qudaıbergen óner kórsetetinin habarlaǵan edik.