Aqtaýda 256 keli bekire tuqymdas balyq tárkilendi
AQTAÝ. KAZINFORM — Mańǵystaý oblysy polıtsııa departamentiniń krımınaldyq polıtsııa basqarmasynyń qyzmetkerleri jedel-izdestirý is-sharalary barysynda bekire tuqymdas balyqtardy zańsyz aınalymǵa shyǵarý faktisiniń jolyn kesti.
8 tamyz kúni Aqtaý qalasynda tabıǵatty qorǵaý polıtsııasy men qalalyq polıtsııa qyzmetkerleriniń qatysýymen Toyota Prado avtokóligi toqtatyldy. Kólikti tekserý barysynda júksalǵyshtan jalpy salmaǵy 256 keli bolatyn 62 bekire tuqymdas balyq anyqtaldy.
Atalǵan fakti boıynsha Qylmystyq kodekstiń 339-babynyń 1-bóligi boıynsha sotqa deıingi tergeý bastaldy.
Polıtsııa sırek kezdesetin jáne joıylyp ketý qaýpi tóngen janýarlar túrlerin zańsyz aýlaý, satyp alý, saqtaý, tasymaldaý jáne ótkizý zańda belgilengen jaýapkershilikke ákep soǵatynyn eskertedi.
Aıta ketelik Almaty oblysynda 260 keli balyqty zańsyz aýlaǵan brakonerler sottaldy.
