Aqtaýda 2,5 myńnan astam aǵash jersinbeı qalǵan
AQTAÝ. KAZINFORM — Aqtaýda sońǵy úsh jylda jańadan otyrǵyzylǵan 2,5 myńnan astam aǵashtyń jersinbegeni anyqtaldy. Buǵan qosa, qalada jasyl jelekterdi sýarýǵa sý jetispeıdi. Qalalyq ákimdik kógaldandyrý jumystarynyń qazirgi jaǵdaıyna qatysty túsinikteme berdi.
Aqtaýda kógaldandyrý jumystary 2022 jyldan beri memlekettik-jekeshelik áriptestik jobasy aıasynda júrgizilip keledi. Bes jylǵa eseptelgen jobanyń jeke seriktesi — «Green City Aktau» JShS.
— «Mańǵyshlaq eksperımenttik botanıkalyq baǵy» RMM júrgizgen tehnıkalyq qadaǵalaý nátıjesine sáıkes, 2023 jyly jańadan otyrǵyzylǵan 959 japyraqty jáne 145 qylqan japyraqty aǵash jersinbegen. 2024 jyly taǵy 957 japyraqty jáne 144 qylqan japyraqty aǵash, al 2025 jyly 254 japyraqty jáne 115 qylqan japyraqty aǵash tamyr jaımaǵan. Osylaısha, úsh jylda barlyǵy 2 574 aǵashtyń jersinbegeni anyqtaldy, — delingen habarlamada.
Sonymen birge, 2023 jyly joba boıynsha josparlanǵan kóshetterdiń barlyǵy tolyq otyrǵyzylmaǵany anyqtalǵan. Atap aıtqanda, 383 japyraqty, 251 qylqan japyraqty aǵash jáne 379 kópjyldyq gúl egilmegen. Ákimdik málimetinshe, atqarylmaǵan jumystarǵa tıesili qarajat bıýdjetke keri qaıtarylǵan.
— Kógaldandyrýdaǵy taǵy bir kúrdeli másele — sýarý. Qazir qaladaǵy saıabaqtar, skverler, alleıalar men shaǵynaýdandardaǵy jasyl jelekter bekitilgen keste boıynsha sýarylyp jatyr. Alaıda jasyl jelekterdi sýarýǵa táýligine 5–5,5 myń tekshe metr sý qajet. Al qazirgi tańda paıdalanylyp otyrǵan 4A shaǵynaýdanyndaǵy jer asty sý kóziniń qýaty táýligine shamamen 1,3–1,5 myń tekshe metr ǵana. Osy tapshylyqtyń ornyn toltyrý úshin sýarý qubyrlary júrgizilmegen aýmaqtarǵa 35 arnaıy sý tasymaldaýshy tehnıka jumyldyrylǵan, — delingen ákimdik jaýabynda.
Sý tapshylyǵy jaǵdaıynda ákimdik tazartylǵan káriz sýyn kógaldandyrýǵa paıdalanýdy josparlap otyr.
— Joba boıynsha jeke ınvestordyń qarajatyna káriz sýyn zamanaýı tehnologııalar arqyly tazalap, qaıta óńdeý kózdelgen. Tazartylǵan sýdy keıin saıabaqtar, skverler men basqa da kógaldandyrylǵan aýmaqtardy sýarýǵa paıdalaný josparlanyp otyr. Bul bastama júzege assa, kógaldandyrý úshin aýyzsýǵa túsetin júktemeni azaıtýǵa múmkindik beredi, — delingen habarlamada.
Buǵan deıin, Mańǵystaýdaǵy úsh aýysymdy mektep máselesi týraly jazǵan bolatynbyz.
