Aqtaýda 21 jastaǵy sarbazdyń ólimine sebepshi bolǵan áskerı qyzmetshiler sottaldy
AQTAÝ. QazAqparat - Aqtaý áskerı soty bes áskerı qyzmetshige úkim oqydy. Olar sarbaz Baqytbek Myrzambekovtiń ólimine jáne eki áskerı qyzmetshiniń soqqyǵa jyǵylýyna aıypty dep tanyldy, dep habarlaıdy QazAqparat lada.kz-ke silteme jasap.
21 jastaǵy shekarashy 2018 jyldyń 15 shildesinde «Ústirt» zastavasynda jattyǵýlardy oryndaý kezinde denesiniń shamadan tys qyzyp ketýi saldarynan qaza tapqan. Ony áskerıler 30 gradýstyq ystyqta jattyǵý jasaýǵa májbúrlegen.
«Ústirt» shekara zastavasynyń komandıri jáne komandıriniń orynbasary, sondaı-aq tehnıkalyq bekettiń bastyǵy, taǵy eki ofıtser túrli merzimge jabyldy.
№2018 áskerı bólimsheniń «Ústirt» shekaralyq zastavasynyń bastyǵy, 29 jastaǵy Baǵlan Musabaev QR Qylmystyq kodeksiniń 453-babynyń 2-bóligine sáıkes aıypty dep tanylyp, 4 jylǵa bas bostandyǵynan aıyryldy.
Onyń orynbasary, 23 jastaǵy Nurbol Sadabaev, tehnıkalyq bekettiń bastyǵy 27 jastaǵy Nurlan Ydryshev QR Qylmystyq kodeksiniń 451-babynyń 2-bóligine sáıkes aıypty dep tanylyp, 5 jyl merzimge bas bostyndyǵynan aıyryldy. Tergeý nusqasyna súıensek, áskerlerdi eki saǵat boıy aptap ystyqta jattyǵýǵa májbúrlegen - osylar. Baqytbek Myrzambekov sulap túsken kezde, ornynan turyp, jattyǵýdy jalǵastyrýǵa májbúrlegen.
Osy bólimsheniń taǵy eki áskerı qyzmetshisi Jasulan Ábikenov pen Nurlan Álmuhan QR Qylmystyq kodeksiniń 440-babynyń 3-bóliginiń 1, 2-tarmaqtaryna sáıkes aıypty dep tanylyp, 4 jylǵa kesildi.
Nurlan Álmuhannyń áskerlerdi uryp-soqpaǵany dáleldengendikten, ol shartty túrde sottaldy.
Sottalǵandardyń árqaısysy qaıtys bolǵan sarbazdyń otbasyna moraldyq ótemaqy retinde 1,5 mıllıon teńge, oǵan qosymsha barlyǵy yntymaqtasa taǵy da 2 mıllıon teńge tóleıdi.
21 jastaǵy Baqytbek Myrzambekov ásker qataryna bıyl sáýirde Qaraǵandydan shaqyrylǵan. Ol otbasyndaǵy eń kenje ul bolǵan. Shaqyrýdyń aldynda ǵana Qaraǵandy polıtehnıka kolledjin bitirgen bolatyn, áskerden kelgen soń qutqarýshy bolýdy armandaıtyn. B. Myrzambekov áskerge óz erkimen barǵan. 
