Aqtaýda 2027 jyly iske qosylatyn bý-gaz qondyrǵysy 300-den astam jumys ornyn ashady
ASTANA. KAZINFORM – Qazaqstan Respýblıkasy Energetıka mınıstrligi men «Aqtaý energetıka kompanııasy» JShS Aqtaý qalasynda qýaty 160 MVt bolatyn bý-gaz qondyrǵysyn (PGÝ) salý jónindegi ınvestıtsııalyq kelisimge keldi.
Qujatqa QR Energetıka mınıstri Erlan Aqkenjenov pen «Aqtaý energetıka kompanııasy» JShS-nyń basshysy Ge Lıchýn qol qoıdy. Aqtaý energetıka kompanııasy 2024 jyly Qytaıdyń iri energetıkalyq korporatsııalarynyń biri China Huadian Corporation kompanııasymen birlesip qurylǵan.
Jobanyń jalpy quny shamamen 108 mlrd teńgeni quraıdy. Qarjylandyrýdyń 70%-yn qytaılyq seriktes qamtamasyz etedi. Mańǵystaý atom energetıkalyq kombınaty alańynda salynatyn bý-gaz qondyrǵysyn iske qosý 2027 jyldyń maýsymyna josparlanǵan.
Kelisimge sáıkes, 300-den astam jumys orny ashylady. Sondaı-aq qazaqstandyq mamandarǵa Qytaıdyń salalyq joǵary oqý oryndarynda «Elektr energetıkasy» mamandyǵy boıynsha magıstratýrada bilim alý úshin jyl saıyn granttar bólinedi. Budan bólek, kadrlardyń biliktiligin arttyrý jáne úzdiksiz oqytý júıesi engiziledi.
Kelisim merzimi aıaqtalǵannan keıin bý-gaz qondyrǵysy «MAEK» JShS teńgerimine óteýsiz beriledi. Joba óńirdegi qýat tapshylyǵyn azaıtyp, elektrmen jabdyqtaý senimdiligin arttyrýǵa jáne batys energetıkalyq júıeniń turaqtylyǵyn kúsheıtýge baǵyttalǵan. Sondaı-aq kompanııa buǵan deıin «MAEK» JShS-niń qoldanystaǵy qýattaryn keńeıtý jumystaryn bastaǵan bolatyn.
Jalpy el aýmaǵynda búginde 4 bý-gaz qondyrǵysynyń qurylysy júrgizilip jatyr. Jańa qondyrǵylar ońtústik óńirlerdi elektr jáne jylý energııasymen qamtamasyz etedi. Qyzylorda oblysynda qýaty 240 MVt bolatyn bý-gaz qondyrǵysyn iske qosý, retteý kezeńinde tur. Túrkistan oblysynda qýaty 1 GVt bolatyn iri joba qurylysy júrgizilýde. Al Almaty qalasynda JEO-2 jáne JEO-3 alańdarynda jalpy qýaty 1,1 GVt bolatyn zamanaýı bolatyn bý-gaz qondyrǵysy salynyp jatyr. Bul qalany senimdi ári ekologııalyq taza energııamen qamtamasyz etýge múmkindik beredi.
Osyǵan deıin elimizde parnıktik gazdar shyǵaryndylary 17%-ǵa qysqartylatynyn jazǵanbyz.
