Aqtaýda 2 adam sýǵa batyp ketti
AQTAÝ. QazAqparat - Aqtaý qalasynda búgin eki azamat sýǵa batyp ketti, dep habarlaıdy QazAqparat Mańǵystaý oblystyq tótenshe jaǵdaılar boıynsha jedel qutqarý jasaǵyna silteme jasap.
Oqıǵa búgin saǵat 11-00-der shamasynda 4A shaǵyn aýdany jaǵalaýynda bolǵan. 3 demalýshy sýǵa batyp ketkenimen, qutqarýshylar tek qyzdy ǵana aman alyp qaldy. Al qaıtys bolǵan er adamnyń bireýiniń denesin kóp uzamaı qutqarýshylar men Mańǵystaý oblystyq ІІD jergilikti polıtsııa qyzmetiniń ókilderi alyp shyqqan.
«Jaǵada 3 demalýshy otyrdy. Qatty soqqan jelden tolqyn kóterilip, olardy jaýyp ketti. Bir-birin qutqarǵysy kelgenimen, olardyń áreketinen nátıje shyqpady. Sóıtip ókinishke qaraı, demalýshylar ózdiginen jaǵaǵa shyǵa almaı qaldy», - delingen jedel-qutqarý otrıady taratqan málimetterde.
Qutqarýshylar batyp ketken ekinshi jigittiń denesin izdestirýde. Ol 1985 jyly týǵan, 4 shaǵyn aýdannyń turǵyny. Múrdesi tabylǵan azamat 1981 jyly týǵan. Qutqarý otrıadynyń habarlaýynsha, aýa raıy qolaısyzdyǵynan súńgýirler tereńge jiberilmeı otyr.
«Qutqarýshylardyń qatarynan aldymen jergilikti polıtsııa qyzmetkerleri kórindi, jaǵaǵa qyzdy solar alyp shyqty. Kóz aldymyzda eki jigit batyp bara jatty. Biraq daýyl qutqarýshylarǵa kedergi keltirip, qutqarýshy qaıyqty jel ysyryp áketti», - deıdi oqıǵany kórgen kýágerler.
Aıgúl Dáden
