Aqtaýda 2,1 mlrd dollarǵa Eko-qala salynady
AQTAÝ. QazAqparat - Mańǵystaý oblysynyń ákimdiginde Aqtaý Eko-qalasyn salý jáne qarjylandyrý týraly kelisimge qol qoıyldy, dep habarlaıdy QazAqparat oblys ákiminiń baspasóz qyzmetine silteme jasap.
Kelisim Global Project Capital Ltd, AAG Corporate Services Ltd, China Road and Bridge Corporation (CRBC) Ltd kompanııalary jáne Mańǵystaý oblysynyń ákimdigi arasynda jasaldy.
«Mańǵystaý - elimizdiń jetekshi aımaqtarynyń biri ekeni barshamyzǵa belgili. Oblystyń ekonomıkalyq damýynyń basym baǵyttary: kólik jáne logıstıka, qurylys, týrızm, agroónerkásip kesheni, sondaı-aq teńiz baǵytynyń damýynda jetekshi ról atqaratyn munaı ken oryndarynyń qyzmet kórsetý salasy. Óndiristi qurý jáne iske qosý úshin barlyq jaǵdaı jasalǵan. Óńirde «Aqtaý teńiz porty» AEA jumys isteıdi. Indýstrııaldyq aımaq qurylǵan. Oblys ákimdigi álemniń túrli elderiniń áleýetti ınvestorlarymen belsendi túrde yntymaqtasýda», - dedi oblys ákimi Eraly Toǵjanov.
Taraptar Mańǵystaý oblysyndaǵy Aqtaý eko-qalashyǵynyń iri jobasyn ázirleý úshin qurylystyń bas merdigerin jáne qarjylandyrý qurylymyn taǵaıyndaıdy. Kelisimge sáıkes, ınvestıtsııa kólemi Ulybrıtanııa tarapynan 2,1 mlrd AQSh dollary kólemindegi jobanyń 100% -yn, al qytaılyq tarap 400 mıllıon dollarǵa banktik kepildikti qamtamasyz etedi. Jobany júzege asyrý úshin Mańǵystaý oblysynyń ákimdigi oblys ortalyǵynyń soltústik bóliginen 865 gektar jer bóledi. Munda qoljetimdi baspana, kommertsııalyq jáne saýda ortalyqtary, mektepter, balabaqshalar men medıtsınalyq ortalyqtar salynady.
Sonymen qatar, IT park, qonaq úı brendteri, sporttyq stadıondar, oıyn-saýyq mekemeleri jáne túrli memlekettik qyzmetter, zamanaýı energetıkalyq/ekologııalyq taza tehnologııalarmen tasymaldaý qyzmetteri kórsetiletin eko-qala álemdik saıası arenada elimizdiń bedelin ósirgen «EKSPO-2017» halyqaralyq kórmesiniń jalǵasy bolmaq. Aqtaý qalasynyń ákimdigi ınfraqurylymdy, onyń ishinde joldardy, energııamen jabdyqtaýdy, kárizdi jáne sýmen qamtamasyz etýdi óz mindetine alady.
