Aqtaýda 18 jastaǵy múmkindigi shekteýli jigitke zorlyq kórsetilgen

AQTAÝ. KAZINFORM — Oqıǵany zardap shekken turǵynnyń anasy habarlady. Orazgúl Qonysovanyń aıtýynsha, aıaldamada turǵan ulyn belgisiz adam kólikke otyrǵyzyp alyp ketip, zorlaǵan.

— Bul jaǵdaı 27 jeltoqsan kúni boldy. Balam 2,5 saǵattan keıin keldi. Keldi de «mama, aıaldamada meni bireý mashınaǵa mińgizip alyp, zorlap ketti. Úıge taksımen áreń jettim, aqshasyn tóleý kerek», — dedi. Syrtqa shyqsam, taksı joq, kútpeı ketip qalǵan. Úıge kelip qaıtadan suradym. Balam aýyr jaǵdaıda boldy. Aıtýynsha, ony teńiz jaǵaǵa aparyp zorlap, belgisiz jerge túsirip ketken. Kostıým-shalbar kıgen, aq djıp mingen adam deıdi, — Orazgúl Qonysova.

Orazgúl Qonysova birden polıtsııa bólimshesine baryp, shaǵym aıtqan. Alaıda saraptama kesh jasalǵan. 

— Polıtsııa bólimine bardym. Olar bizdi birden Aqtaý qalalyq polıtsııa basqarmasyna alyp bardy. Onda jaýap alǵan joq, aryzymdy qabyldaǵan joq. 1,5 saǵattan soń úıge qaıtaryp jiberdi. Kelesi kúni tańǵy saǵat 4 te shaqyryp, keshki altyǵa deıin jaýap aldy. Sodan ózderi qasymyzda erip júrip, saraptamaǵa alyp bardy. Alaıda saraptama proktologtyń anyqtamasy joq dep qabyldamady. Aqyly proktologqa barsaq, kesh qaldyńyzdar, eki saǵat ishinde kelý kerek edińizder dedi. Osylaı júrgende saraptama 4 kúnge keshikti. Odan keıin kóshedegi kameralardy qaraýǵa ruqsat bermeı qoıdy, — deıdi áıel.

Orazgúl Qonysova prokýratýraǵa da shaǵym jazǵan. Alaıda 40 kún ótken, jaýap joq. Talaby — kináli adamdy taýyp, jazalanǵanyn qalaıdy. Jalǵyzbasty áıeldiń eki uly bar. Zardap shekken 1-toptaǵy múgedek balasy.

Mańǵystaý oblystyq polıtsııa departamenti atalǵan derek boıynsha qylmystyq is qozǵalǵanyn habarlady. 

— Osy derekke qatysty QR Qylmystyq Kodekstiń 121-baby boıynsha qylmystyq is qozǵaldy (seksýaldyq sıpattaǵy zorlyq-zombylyq áreketteri). Barlyq qajetti saraptamalar taǵaıyndaldy. Іsti polıtsııa departamentiniń basshylyǵy baqylaýǵa aldy. Tergeý jalǵasýda, — delingen habarlamada.

Buǵan deıin, Aqtaýda 30 jastaǵy qyzdy 5 adam urlap áketip, zorlap, qorlyq kórsetkeni úshin sottalǵany týraly jazǵan bolatynbyz.