Aqtaýda 15 jasar qyzdy zorlady degen kúdiktiniń úıiniń aldyna bir top adam jınaldy
Oblystyq polıtsııa departamenti baspasóz qyzmetiniń habarlaýynsha, Aqtaý qalasy polıtsııa basqarmasyna 5-shaǵynaýdandaǵy 4-úı janyna bir top adamnyń jınalǵany týraly shaqyrtý kelip túsken.
«Shaqyrtýǵa Aqtaý qalasy patrýldik polıtsııa batalony bardy. Anyqtalǵan tulǵalar jaǵdaıdyń mán-jaıyn anyqtaý úshin Aqtaý qalasy polıtsııa basqarmasyna jetkizildi. Oblys turǵyndaryna úsh adamnan artyq top bolyp jınalýǵa tyıym salynatynyn eskertemiz» delingen habarlamada.
Joǵaryda atap ótkendeı, áleýmettik jelide 15 jasar qyzdy karate-do bapkeriniń májbúrlep zorlap kelgeni týraly aqparat taraǵan bolatyn. Jeli belsendileri bólisip, kúdiktige ádil jaza qoldaný kerektigin suraǵan bolatyn. Osyǵan qatysty polıtsııa departamenti basshysynyń orynbasary Amangeldi Dosjanov málimdeme jasady.
«11 mamyr kúni WhatsApp messenjerinde jábirlenýshi jáne qylmys jasaǵan kúdikti týraly anyq-qanyǵy belgisiz málimetter tarap ketti. Al 12 mamyrda aımaqtyq polıtsııa departamenti QR Qylmystyq Kodeksiniń 147-baby 5-bóligimen tergep-tekserýdi bastady. Zańnyń osy babymen jeke ómirge qol suǵý boıynsha is qozǵalǵan. Ózderińizge málim, áleýmettik jelide kámeletke tolmaǵan qyz balany zorlaý týraly jalǵan málimet tarap jatyr. Bul derek boıynsha da sotqa deıingi tergeý bastaldy. Ol úshin zańmen 7 jylǵa deıin bas bostandyǵynan aıyrý jazasy kózdelgen. Jalǵan aqparat taratqan tulǵany anyqtaýǵa baǵyttalǵan jedel-izdestirý jumystary júrgizilip jatyr. Atalǵan qylmystyq is departament basshylyǵynyń baqylaýynda. Ózge de aqparat QR Qylmystyq-protsestik kodeksiniń 201-babyna sáıkes tergeý aıaqtalǵansha jarııalanbaıdy», - deıdi oblystyq polıtsııa departamenti basshysynyń orynbasary Amangeldi Dosjanov.
Amangeldi Asqarulynyń aıtýynsha, osy aqparattan soń áleýmettik jelilerde zańsyz narazylyq aktsııasyn ótkizýge shaqyrýlar taratylǵan.
«Keshe, ıaǵnı 12 mamyrda 5-shaǵynaýdan №4-shi úı janyna bir top jas áleýmettik jeliden estip-bilgen qylmys dereginiń mán-jaıyn anyqtaý úshin jınalyp, ózderiniń azamattyq ustanymyn bildirgisi kelgen. Budan soń barlyǵy da úıine jiberildi. Osy oraıda turǵyndardy jalǵan aqparatqa senbeýge jáne qoǵamdyq tártipti buzýǵa baǵyttalǵan arandatý áreketterine boı aldyrmaýyn suraımyz» - deıdi A.Dosjanov.
Aıta keteıik, elimizde ulttyq arazdyqty qozdyrý jáne kórineý jalǵan aqparat taratýǵa zańmen tyıym salynǵan.