Aqtaýda 13 jasar oqýshy jasandy qol jasady
ASTANA. QAZAQPARAT - Aqtaýdaǵy robototehnıka klýbynyń bas bapkeri Dmıtrıı Kýrıchevtiń basshylyǵynda daryndy oqýshy 13 jasar Danııl Belov jasandy qol jasady. Olardyń «qoly» birshama arzan ári qoljetimdi bolyp shyqty.
- Qarapaıym protezdi jalǵaý úshin ol ornatylatyn jer tolyǵymen bitken bolýy kerek. Oǵan jarty jyldan bir jarym jylǵa deıin ýaqyt ketedi. Al biz jasaǵan jasandy qoldy kez kelgen qolǵa ornatýǵa bolady, - deıdi oqýshy.
Bir tańǵalarlyǵy, ıdeıanyń týýynan ony júzege asyrǵanǵa deıin birneshe kún ǵana ýaqyt ketken. Ónertapqyshtar protezdi ondaǵan konstrýktorlyq detaldardan qurǵan. Qajetine qaraı olardy jeńilirek, qolaılyraq bólshektermen aýystyrýǵa bolady.
«Bapker maǵan qol jasaý kerektigin aıtqanda, abdyrap qalǵanym ras. Biz ony birneshe ret quryp, buzyp, qaıta qurdyq. Keıde jasaǵanymyz istemeı qalsa, endi birde tym qatty jumys istep ketti. Táýirirek nusqasyn jasadyq-aý degende toqtadyq», - deıdi Aqtaý qalasyndaǵy ekonomıkalyq lıtseıdiń 8-synyp oqýshysy Danııl Belov.
Protez robottandyrylǵan. Jumys isteý prıntsıpi erekshe qurylǵy neıroınterfeıstiń kómegimen adamnyń oı arqyly basqarylady. Interfeıs bas mıdyń zeıin shoǵyrlandyrý, medıtatsııa sııaqty buıryqtaryn jetkizýge múmkindik jasaıdy.
Danııldyń Aqtaýdaǵy robot klýbynda júrgenine eki jylǵa jýyqtap qalǵan. Sabaq jáne jattyǵýlardan bos kezinde baǵdarlamalaý kýrstaryna qatynaıdy, al mektepte fızıka men matematıkany súıip oqıtynyn aıtady.
Qazirge Danııl bolashaqta kim bolatyny týraly bir toqtamǵa kelgen joq eken, biraq esesine kezektegi ónertabysy ne bolatynyn anyq biledi. Ol qazir bapkerimen birge estý qabiletin joǵaltqan adamdardyń ómirin jaqsartatyn qurylǵy jasaý ústinde bas qatyrýda.
